दुचाकीची समोरासमोर धडक; २१ वर्षीय तरुणाचा मृत्यू, गुन्हा दाखल

भरधाव वेगात येणाऱ्या दुचाकीने राहुलच्या दुचाकीला समोरासमोर जोराची धडक दिली. या अपघातात राहुल गंभीर जखमी झाला.

उमरखेड (यवतमाळ) : येथील दत्त मंदिराजवळील हरदडा फाट्याजवळ दुचाकीची समोरासमोर धडक होऊन हिमायतनगर तालुक्यातील पळसपूर येथील २१ वर्षीय तरुण राहुल विश्वंभरराव बोंबीलवार याचा मृत्यू झाला. याप्रकरणी मृत राहुलचा भाऊ विकी बोंबीलवार याने दिलेल्या फिर्यादीवरून उमरखेड पोलीस ठाण्यात गुन्हा दाखल झाला आहे.

नांदेड जिल्ह्यातील हिमायतनगर तालुक्यातील पळसपूर येथील राहुल बोंबीलवार सध्या नांदेडमधील दातीवाला पेट्रोल पंपासमोर राहतो. तो आपल्या मोटारसायकलने उमरखेड येथून विडूळमार्गे ढाणकीकडे जात होता. त्यावेळी एका  दुचाकीने (एमएच २९ वाय ५५१६) भरधाव वेगात राहुलच्या दुचाकीला समोरासमोर जोराची धडक दिली. या अपघातात राहुल गंभीर जखमी झाला. त्याला तातडीने उमरखेड येथील शासकीय रुग्णालयात उपचारासाठी हलविण्यात आले. मात्र, उपचारादरम्यान त्याचा मृत्यू झाला. याप्रकरणी उमरखेड ठाण्यात गुन्हा दाखल करण्यात आला आहे.

भरधाव दुचाकीने ठोकरले; एकजण गंभीर

आर्णी तालुक्यातील परसोडा येथील नारायण देशमुख हे त्यांच्या दुचाकीवरून आर्णीवरून गावाकडे परतत असताना एमएच-२९-बीजी-७०२० या दुचाकीचालकाने भरधाव वेगाने नारायण देशमुख यांच्या दुचाकीला धडक दिली. या अपघातात नारायण देशमुख हे जबर जखमी झाले आहेत. या प्रकरणी विक्रम देशमुख यांच्या फिर्यादीवरून आर्णी पोलीस ठाण्यात गुन्हा दाखल करण्यात आला आहे. या अपघातात देशमुख यांच्या वाहनाचे २५ हजारांचे नुकसान झाल्याचेही फिर्यादीत म्हटले आहे.