लोकमत न्यूज नेटवर्कवाशिम : जिल्ह्यात ३१ आॅगस्टपर्यंत लॉकडाऊन आहे. १ सप्टेंबरपासून ‘अनलॉक-४’च्या टप्प्यात जिल्ह्यात नेमके काय खुले राहणार आणि कशावर निर्बंध कायम राहणार, याकडे जिल्हावासियांचे लक्ष लागून आहे. ‘अनलॉक-४’संदर्भात केंद्र शासनाच्या सूचना प्राप्त झाल्या असून, अद्याप राज्य शासनाच्या सूचना प्राप्त झाल्या नाहीत, असे जिल्हा प्रशासनाने रविवारी सायंकाळी स्पष्ट केले.कोरोना विषाणू संसर्गाचा प्रादुर्भाव रोखण्यासाठी देशात २४ मार्चपासून लॉकडाऊन आहे. लॉकडाऊनमुळे अर्थव्यवस्थेला जबर फटका बसल्याने लॉकडाऊनमध्ये हळूहळू शिथिलता आणली जात आहे. जिल्ह्यात सध्या ३१ आॅगस्टपर्यंत लॉकडाऊन असून, सर्व दुकाने, आस्थापना हे सकाळी १० ते सायंकाळी ५ वाजेपर्यंतच्या कालावधीत सुरु ठेवण्यास मुभा आहे. जिल्ह्यात कोरोनाबाधित रुग्णांची संख्या झपाट्याने वाढत आहे, दुसरीकडे लॉकडाऊनमुळे अर्थचक्रही प्रभावित होत आहे. त्यामुळे १ सप्टेंबरपासून दुकाने सुरू ठेवण्याच्या वेळेत वाढ होण्याचे संकेत आहे. ‘अनलॉक-४’ संदर्भात केंद्र शासनाच्या मार्गदर्शक सूचना जिल्हा प्रशासनाला प्राप्त झाल्या आहेत. परंतू, अद्याप राज्य शासनाच्या मार्गदर्शक सूचना प्राप्त झाल्या नाहीत. राज्य शासनाच्या मार्गदर्शक सुचनांनुसार जिल्ह्यात ‘अनलॉक-४’च्या टप्प्याची अंमलबजावणी होणार असल्याने तुर्तास जिल्हा प्रशासनासह नागरिकांना राज्य शासनाच्या मार्गदर्शक सूचनांची प्रतीक्षा आहे.
३१ आॅगस्टपर्यंत यावर आहेत निर्बंधसर्व शाळा, कॉलेज, शैक्षणिक संस्था, प्रशिक्षण संस्था, कोचिंग क्लासेस इत्यादी ३१ आॅगस्टपर्यंत बदं आहेत. हॉटेल्स, रेस्टॉरंट आणि इतर आतिथ्य सेवा, सिनेमागृह, जिम्नॅशियम, जलतरण तलावदेखील बंदच आहेत. सामाजिक, राजकीय, क्रीडा, मनोरंजन, शैक्षणिक, सांस्कृतिक, धार्मिक कार्यक्रम व सर्व प्रकारच्या मेळाव्यांवर बंदी आहे. सर्व धार्मिकस्थळे, प्रार्थनास्थळे सामान्य व्यक्तींसाठी बंद असून, कोणत्याही परिस्थितीत धार्मिक सभा, धार्मिक परिषद, धार्मिक मेळावे ३१ आॅगस्टपर्यंत भरविता येणार नाहीत.‘अनलॉक-४’संदर्भात केंद्र शासनाच्या सूचना प्राप्त झाल्या आहेत. मात्र, राज्य शासनाच्या सूचना रविवारी सायंकाळी उशिरापर्यंत प्राप्त होण्याची दाट शक्यता आहे. त्यानुसार जिल्ह्यात अनलॉक-४’च्या टप्प्याची अंमलबजावणी केली जाईल.- शैलेश हिंगे,निवासी उपजिल्हाधिकारी, वाशिम