दोन ट्रकची अमोरासमोर धडक, एक ठार, दोन जखमी

दोन ट्रकची अमोरसमोर धडक, एक ठार, दोन जखमी झाले.

लोकमत न्यूज नेटवर्क जऊळका रेल्वे (वाशिम) : आयशर-ट्रकची समोरासमोर धडक झाल्याने आयशर चालकाचा जागीच मृत्यू झाला तर क्लिनरसह ट्रक चालक गंभीर जखमी झाल्याची घटना नागपूर-औरंगाबाद एक्सप्रेस हायवेवरील जऊळका रेल्वे गावानजीक ७ जुलै रोजी रात्री ११.३० वाजतादम्यान घडली. तुकाराम धोंडीबा बारबैलन् (२८) रा. गंगापूर जि. औरंगाबाद असे मृतकाचे नाव आहे. औरंगाबाद येथून एमएच २० ईएल ६५१९ क्रमांकाचा आयशर भाजीपाला घेऊन अमरावतीकडे जात होता तर एमएच २७ बीएक्स ११४९ क्रमांकाचा ट्रक अमरावती येथून मुंबईकडे जात होता. दरम्यान जऊळका गावानजीक ७ जुलैच्या रात्री ११.३० वाजतादरम्यान एका धाब्याजवळ या दोन्ही वाहनांची समोरासमोर जबर धडक झाली. यामध्ये आयशर चालक तुकाराम बारबैल रा. गंगापूर जहॉगीर (शेंद्रा एमआयडीसी) ता. गंगापूर जि. औरंगाबाद याचा जागीच मृत्यू झाला तर आयशरचा क्लिनर व ट्रकचा चालक गंभीर जखमी झाले. अपघाताची माहिती मिळताच जऊळका रेल्वे पोलीस स्टेशनचे ठाणेदार बाळू जाधवर, पोलीस उपनिरीक्षक पंडीत हे आपल्या ताफ्यासह घटनास्थळी दाखल झाले. जखमींना वाशिम येथे सरकारी रुग्णालयात उपचारार्थ हलविले. या अपघातामुळे नागपूर ते औरंगाबाद या द्रुतगती मार्गावर सकाळी ७ वाजेपर्यंत वाहनांच्या रांगा एक किमी अंतरापर्यंत लागल्या होत्या. अपघातग्रस्त वाहने बाजूला केल्याने सकाळी ७ वाजतानंतर या मार्गावरील वाहतूक सुरळीत झाली.