पोटात चाकू भोसकून इसमास केले गंभीर जखमी

महिलेच्या मामास पोटात चाकू भोसकून गंभीर जखमी केल्याची घटना ७ जून रोजी सायंकाळी ५ वाजताच्या सुमारास घडली.

लोकमत न्यूज नेटवर्कमानोरा (वाशिम) : तालुक्यातील वरोली येथे पाहुणी आलेल्या महिलेवर एका युवकाने प्रेम व्यक्त केले. त्यास संबंधित महिलेने नकार दिला. तसेच याच कारणावरून झालेल्या वादात आरोपीने फिर्यादी महिलेच्या मामास पोटात चाकू भोसकून गंभीर जखमी केल्याची घटना ७ जून रोजी सायंकाळी ५ वाजताच्या सुमारास घडली. याप्रकरणी दाखल फिर्यादीवरून मानोरा पोलिसांनी आरोपी युवकास अटक केली आहे.याबाबत पोलिसांकडून प्राप्त माहितीनुसार, फिर्यादी महिलेने पोलिसांत दाखल केलेल्या फिर्यादीत नमूद केले आहे, की ती वरोली येथे पाहुणी म्हणून आली होती. यादरम्यान आरोपी संतोष सुधाकर नाटकर याने माझे तुझ्यावर प्रेम आहे, असे म्हटले. त्यावरून संतप्त झालेल्या महिलेने आरोपीस चांगलेच फटकारले. यामुळे दोघांमध्ये शाब्दीक वाद झाला. तो सोडविण्यासाठी फिर्यादीचा भाऊ व मामा मधस्ती करित असताना आरोपी संतोष नाटकर याने त्याच्या हातातील चाकू मामाच्या पोटात मारुन जखमी केले. त्यांच्यावर ग्रामीण रुग्णालयात प्राथमिक उपचार करून पुढील उपचाराकरिता तातडीने यवतमाळ येथे हलविण्यात आले. याप्रकरणी मानोरा पोलिसांनी आरोपी संतोष सुधाकर नाटकर याच्याविरुध्द भादंविचे कलम ३२६, ५०४ नुसार गुन्हा दाखल केला. पुढील तपास एएसआय मनोहर नागरीकर,  जगन्नााथ घाटे करित आहेत.