वाशिम : जिल्ह्यातील कारंजा आगाराची कारंजा-अकोला एसटी बस आणि कारची समोरासमोर धडक झाली. या अपघातात कारने प्रवास करित असलेले माजी आमदार विजयराज शिंदे यांच्यासह अन्य एकजण जखमी झाला. सुदैवाने एसटी बसमधील प्रवाशांना कुठलीही दुखापत झाली नाही. ही घटना ७ ऑक्टोबर रोजी दुपारी १२ वाजेच्या सुमारास घडली.
प्राप्त माहितीनुसार, कारंजा आगाराची एम.एच. ४० एन ९७१८ या क्रमांकाची एसटी ५० प्रवासी घेऊन कारंजा येथून अकोलाकडे चालली होती. यादरम्यान काटेपुर्णा गावाजवळ अमरावती येथे खासदार अनिल बोंडे यांच्या भेटीला जात असलेल्या माजी आमदार विजयराज शिंदे यांच्या कारची एसटीला समोरून धडक बसली. या अपघातात शिंदे जखमी झाले. माहिती मिळताच पोलिसांनी घटनास्थळी धाव घेऊन जखमींना उपचारासाठी अकोला येथे रवाना केले. या अपघातात कारच्या दर्शनी भागाचे मोठ्या प्रमाणात नुकसान झाले आहे. अपघाताच्या घटनेनंतर एसटी बसमधील प्रवाशांना अन्य बसने पुढील प्रवासाला रवाना करण्यात आले.