मतदारसंघातील रस्त्यांबाबत खासदार गवळी यांनी लोकसभेत मांडला प्रश्न

यावेळी खासदार गवळी यांनी वाशिम-यवतमाळ लोकसभा मतदारसंघात हायवेचे काम प्रगतिपथावर असून सुमारे ९० टक्के काम पूर्ण करून घेतले आहे. मात्र आता उर्वरित १० टक्के काम कधी पूर्ण करणार आहात, असा प्रश्न त्यांनी संसदेत थेट केंद्रीय मंत्री नितीन गडकरी यांना करत सदर कामांचा पाठपुरावा करण्याकरिता आपण हाऊसमध्ये प्रश्न उपस्थित केला असल्याचे खासदार गवळी यांनी प्रश्नोत्तरादरम्यान सांगितले. यावेळी खासदार गवळी यांनी वाशिम जिल्ह्याचा आकांक्षित जिल्ह्यात समावेश असून आपल्या मतदारसंघात अजूनही रस्त्यांची बरीच कामे रखडलेली आहेत. त्यामुळे केंद्रीय मंत्री गडकरींनी ती कामेसुद्धा मंजूर करून द्यावी असे म्हटले असता गडकरी यांनी खासदार गवळींनी यापूर्वी सांगितलेली कामे पूर्ण करण्यात आली आहेत. तरीही खासदार गवळी जी कोणती कामे सांगतील ती कामे प्राधान्याने पूर्ण करण्यात येतील, असे ठोस आश्वासन दिले. सामाजिक, आर्थिक व शैक्षणिकदृष्ट्या मागासलेल्या व आकांक्षित जिल्ह्यात समाविष्ट असलेल्या वाशिम जिल्ह्याच्या विकासासाठी पंतप्रधान नरेंद्र मोदी यांच्या नेतृत्वातील सरकार कटिबद्ध असून सर्वात जास्त शेतकरी आत्महत्याग्रस्त म्हणून पश्चिम विदर्भाच्या विकासासाठी निधी कमी पडणार नाही, असेही आश्वासन नितीन गडकरी यांनी खासदार गवळी यांच्या प्रश्नाला उत्तर देताना दिले.

.....................

रस्ता कामासाठी निधी कमी पडणार नाही

हायवेचे रखडलेले काम कधी पूर्ण होणार, असा प्रश्न खासदार भावना गवळी यांनी गुरुवारी संसदेत मांडला व याबाबत थेट केंद्रीयमंत्री नितीन गडकरी यांना यावर मार्गदर्शन करण्याच्या सूचना केल्यात. गडकरी यांनी सुध्दा आपल्याकडे निधीची कमतरता नाही. तुमच्या जिल्ह्यातील कामासाठी निधी कमी न पडू देण्याचे आश्वासन भावना गवळी यांना दिले.