मोकाट गुरांचा बंदोबस्त करा
मंगरूळपीर : शहरात ठिकठिकाणी मोकाट गुरांचा ठिय्या आहे, तसेच मोकाट गुरे भररस्त्यावर बसने, रस्त्यावर वावरणे इत्यादी कारणांमुळे वाहतुकीस अडथळा येत असून, किरकोळ अपघात घडत आहेत, तसेच शहरात घाण होत आहे. त्यामुळे मोकाट जनावरांचा पालिकेने बंदोबस्त करावा, अशी मागणी भाजप नगरसेवक अनिल गावंडे यांनी केली आहे.
डॉक्टरांची रिक्त पदे भरण्याची मागणी
वाशिम : जिल्हा सामान्य रुग्णालय, उपजिल्हा रुग्णालयांसह ग्रामीण रुग्णालयात विविध वर्गांतील तज्ज्ञ डॉक्टरांची निम्मी पदे रिक्त आहेत. रिक्त पदे भरण्याची मागणी रिपाइं (आठवले गट) जिल्हाध्यक्ष तेजराव वानखेडे यांनी केली असून, ही पदे भरण्यात न आल्यास आंदाेलनाचा इशाराही देण्यात आला आहे.
लाेककलावंतांना पॅकेज जाहीर करा
वाशिम : कोरोना काळात लोककलावंतांना रोजगाराचे कोणतेही काम मिळाले नाही. त्यामुळे कुटुंबाचा उदरनिर्वाह होण्यासाठी शासनाने पॅकेज जाहीर करावे, अशी मागणी लोककलावंतांनी जिल्हाधिकाऱ्यांकडे निवेदनाद्वारे केली आहे.
महत्त्वाची कार्यालये भाड्याच्या खाेलीत
वाशिम : वाशिम तालुका कृषी अधिकारी कार्यालय, उपविभागीय अधिकारी कार्यालय, तसेच जिल्हा जलसंधारण, मातीपरीक्षण व मृदसंधारण कार्यालयही भाड्याच्या जागेत आहे. सुविधांयुक्त स्वतंत्र कार्यालय केव्हा मिळणार? अशी विचारणा कर्मचाऱ्यांमधून होत आहे. सद्य:स्थितीत जेथे कार्यालय आहेत तेथे अनेक अडचणींचा सामना कर्मचाऱ्यांना करावा लागत आहे.
वळणमार्गावर फलक उभारण्याची मागणी
वाशिम : मेडशी (ता. मालेगाव) येथून अकोल्याकडे जाणाऱ्या रस्त्यावर मोठा वळण मार्ग आहे. वाहने वळण घेत असताना समोरून येणारी वाहने सहजासहजी दिसत नाहीत. यामुळे दोन्हीकडून फलक असणे आवश्यक आहे. तो उभारण्यात यावा, अशी मागणी होत आहे. ही मागणी अनेक दिवसांपासून हाेत असताना संबंधितांकडून याकडे दुर्लक्ष हाेत असल्याचे दिसून येत आहे.