बहिणीच्या मारेकऱ्यांवर खुनाचा गुन्हा दाखल करा.

रिसोड येथील प्रकरण.

वाशिम :

जिल्ह्यातील रिसोड येथे वास्तव्यास असलेल्या आपल्या बहिणीचा १२ मार्च रोजी संदिग्ध अवस्थेत मृत्यू झाल्याची घटना घडली असून आपल्या बहिणीच्या मारेकऱ्यांवर खुनाचा गुन्हा दाखल करावा अशी मागणी मृतक दीपा निलेश छित्तरका हिचा भाऊ राहुल कचरुलाल अग्रवाल यांनी १५ मार्च रोजी जिल्हा पोलिस अधीक्षक वसंत परदेशी यांना दिलेल्या तक्रारीत नमूद केली आहे.

राहुल अग्रवाल रा.गणेश डुप्लेक्स,बजरंग वाडी जवळ,मोठी उमरी,अकोला यांनी पोलीस अधीक्षक वाशिम यांना दिलेल्या तक्रारीत नमूद केले की,रिसोड येथील रहिवासी व पुणे येथे खाजगी कंपनीत सॉफ्टवेअर इंजिनियर असलेल्या निलेश सुभाषचंद छित्तरका याचे सोबत २९ जानेवारी २०१४ मध्ये बहीण दीपा हिचे लग्न झाले होते.माहेरून वारंवार पैशांची मागणी करून निलेश हा लग्नापासूनच दीपा हिचा कायम मानसिक व शारीरिक छळ करायचा.आपली बहीण दीपा ही आत्महत्या करूच शकत नाही.त्यामुळे तिचा खून करून आत्महत्या दर्शविणारे आरोपी पती निलेश छित्तरका,दीर पंकज छित्तरका,भावजय अंजना छित्तरका व सासरे सुभाषचंद छित्तरका सर्व रा.रिसोड यांनी वारंवार बहीण दीपा हिचा मानसिक व शारीरिक छळ करून संगनमताने तिचा खून केलयाचा आरोप राहुल अग्रवाल यांनी आपल्या तक्रारीत नमूद करून सर्व आरोपितांविरुद्ध कलम ३०२ अन्वये गुन्हा दाखल करण्यात यावा.तसेच सखोल चौकशी करून या आरोपीना कठोर शिक्षा व्हावी अशी मागणी आपल्या तक्रारीत केली आहे.