वाशिम जिल्ह्यात वार्षिक सरासरी ७८९ मि.मी. पाऊस अपेक्षित असतो, तर १ जूनपासून १७ जुलैपर्यंत जिल्ह्यात सरासरी ३०० मि.मी. पाऊस अपेक्षित असतो. प्रत्यक्षात यावर्षी याच कालावधीत ३९१.८ मि.मी. पावसाची नोंद झाली असून, हे प्रमाण सरासरीच्या १३०.६ टक्के आहे. जिल्ह्यात यंदा मान्सून विलंबाने दाखल झाला. तथापि, १ जूनपासून मान्सूनपूर्व पावसाने दमदार हजेरी लावल्याने २० जूनपर्यंत जिल्ह्यात समाधानकारक पावसाची नोंद झाली होती. त्यानंतर मात्र जुलैच्या दुस-या आठवड्यापर्यंत पावसाने खंड दिला होता. त्यामुळे वीतभर वाढलेली खरीप पिके संकटात सापडली होती. जुलै महिन्यातील दुस-या आठवड्याच्या मध्यंतरापासून पावसाने जिल्ह्यात पुनरागमन केले. तेव्हापासून जिल्ह्यात अधूनमधून पाऊस पडतच आहे. त्यात गत आठवडाभरापासून सतत पाऊस पडत असल्याने सरासरीत वाढ झाली आहे.
-----------------
कारंजात पावसाची १० टक्के तूट
कारंजा तालुक्यात जून ते सप्टेंबरदरम्यान अर्थात पावसाळ्याच्या एकूण सरासरीत ७२२.६ मि. मी. पाऊस अपेक्षित असतो, तर १ जून ते १७ जुलैदरम्यान -२९४.०० मि. मी. पाऊस अपेक्षित असतो. प्रत्यक्षात याच कालावधीत कारंजा तालुक्यात केवळ २६४.५ मि.मी. पाऊस पडला आहे. हे प्रमाण आजवरच्या कालावधीतील सरासरीच्या ९०.०० टक्के आहे. त्यामुळे कारंजा तालुक्यात पावसाची १० टक्के तूट आहे. दरम्यान, कारंजा तालुक्यातील पावसाचे प्रमाण वार्षिक सरासरीच्या ३६.६ टक्के आहे. अर्थात तालुक्यातील पावसाची तूट भरून निघण्यासाठी पुढील काळात दमदार पावसाची गरज आहे.
-------------------------
मानो-यात वार्षिक सरासरीच्या ६० टक्के पाऊस
जिल्ह्यात यंदा मंगरुळपीर तालुक्याच्या खालोखाल मानोरा तालुक्यात पावसाचे प्रमाण अधिक आहे. या तालुक्यात जून ते सप्टेंबरच्या कालावधीत अर्थात वार्षिक सरासरी ७१३.० पाऊस अपेक्षित असतो. त्यात १ जून ते १७ जुलैपर्यंतच या तालुक्यात ४२९.१ मि.मी. पावसाची नोंद झाली असून, हे प्रमाण वार्षिक सरासरीच्या ६०.१ टक्के आहे. दमदार पावसामुळे या तालुक्यातील २३ प्रकल्पांपैकी बहुतांश प्रकल्पांत ५० टक्क्यांहून अधिक जलसाठाही झाला असल्याने शेतक-यांना सिंचनासाठी पाण्याचा आधार मिळण्याची आशाही पल्लवित झाली आहे.
तालुकानिहाय अपेक्षित आणि प्रत्यक्ष पाऊस (१ जून ते १७ जुलै)
तालुका - अपेक्षित पाऊस - प्रत्यक्ष पाऊस -टक्के
वाशिम - ३४६.२ - ३८७.६ - ११२.०
रिसोड - २९६.७ - ४२५.५ - १४३.४
मालेगाव - ३०१.६ - ४११.९ - १३६.६
मंगरुळपीर - २६३.१ - ४५०.०० - १७१.००
मानोरा - २७१.७ - ४२९.१ - १५७.९
कारंजा -२९४.०० २६४.५ - ९०.००
----------