..................
चाैसाळा रस्त्याची दुरावस्था
वाशिम : जिल्ह्यातील मानोरा तालुक्यातील जनुना ते चौसाळा हा आठ कि.मी. अंतराचा रस्ता गेल्या वर्षभरापूर्वी तयार करण्यात आला; परंतु रस्त्याची आता चाळण झाली आहे. या रस्त्यावरून प्रवास करणेही कठीण झाले आहे. यासंदर्भात नागरिकांनी अनेकवेळा संबंधित यंत्रणेकडे निवेदन दिले; मात्र त्याचा काहीच फायदा झालेला नाही. त्यामुळे नागरिकांमधून रोष व्यक्त होत आहे.
..................
रस्त्याच्या कडा भरण्याची मागणी
वाशिम : सिव्हिल लाईन परिसरातील जिल्हाधिकारी कार्यालय ते जिल्हा स्त्री रुग्णालय या रस्त्यावरील सामाजिक न्याय भवननजीक रस्त्याची बाजू खोलगट झाली आहे. त्यामुळे समोरून येणाऱ्या वाहनाला बाजू देताना गैरसोय होते. रस्त्याच्या कडा भरण्याची मागणी वाहनचालकांनी बुधवारी नगरपरिषदेकडे केली.
..................
संकेतस्थळावर नोंदणी करण्याचे आवाहन
वाशिम : युवक-युवतींना रोजगार तथा स्वयंरोजगाराची तसेच कौशल्य विकासाच्या संधी उपलब्ध करून देण्यासाठी कौशल्य विकास, रोजगार व उद्योजकता विभागाकडून ‘महास्वयंम’ हे संकेतस्थळ विकसित करण्यात आले आहे. युवक, युवतींनी या संकेतस्थळावर नोंदणी करावी, असे आवाहन करण्यात आले.
............
वीजपुरवठा खंडित; पाणीपुरवठा प्रभावित
वाशिम : जऊळका जिल्हा परिषद गटात सलग वीजपुरवठा राहत नाही तसेच पुरेशा दाबात वीजपुरवठा होत नसल्याने पाणीपुरवठा योजनेंतर्गतचा जलकुंभ भरण्यास विलंब लागतो. परिणामी, पाणीपुरवठाही प्रभावित होत असल्याचे दिसून येते. याकडे संबंधित यंत्रणेने लक्ष देऊन पुरेशा दाबात वीजपुरवठा करावा, अशी मागणी गावकऱ्यांमधून होत आहे.