वाशिम : जिल्ह्यात ३१ जानेवारीपासून पल्स पोलिओ लसीकरण मोहीम राबविण्यात येत असून, ३ फेब्रुवारीपर्यंत १.२० लाखांपैकी १.१० लाख बालकांना पोलिओचा डोस पाजण्यात आला. बुथवर न आलेल्या ग्रामीण भागातील बालकांना ४ फेब्रुवारीपर्यंत पोलिओचा डोस दिला जाणार आहे.जिल्ह्यात ३१ जानेवारी रोजी सकाळी ८ ते सायंकाळी ५ वाजेपर्यंत पोलिओ लसीकरण मोहिम राबविण्यात आली. पहिल्या दिवशी ० ते ५ वर्षे वयोगटातील एक लाख २० हजार ७९९ पैकी एक लाख सात हजार ६६७ बालकांना पोलिओचा डोस पाजण्यात आला. बुथवर न आलेल्या बालकांना पोलिओ डोस पाजण्यासाठी ग्रामीण भागामध्ये २ ते ४ फेब्रुवारी दरम्यान आणि शहरी भागामध्ये २ ते ६ फेब्रुवारी दरम्यान घरोघरी जावून सर्वेक्षण केले जात आहे. याकरिता ग्रामीण भागात १६३४ तर शहरी भागात ८१ असे एकूण १ हजार ७१५ चमू कार्यरत आहेत. दोन दिवसात जवळपास तीन हजार बालकांना पोलिओ डोस पाजण्यात आला. वीट भट्ट्या, गिट्टी खदान, मजुरांच्या वस्त्यांमधील बालकांना लसीकरण करण्यासाठी ग्रामीण भागात २२ व शहरी भागात ८ अशा एकूण ३० मोबाईल टीम कार्यरत आहेत.
जिल्ह्यात ३१ जानेवारी रोजी बुथवर न आलेल्या बालकांना पोलिओ डोस पाजण्यासाठी ग्रामीण भागात २ ते ४ फेब्रुवारी आणि शहरी भागात २ ते ६ फेब्रुवारी या दरम्यान विशेष मोहिम राबविण्यात येत आहे. ० ते ५ वर्षे वयोगटातील ज्या बालकांना अद्याप पोलिओ डोस मिळाला नसेल तर पालकांनी नजीकच्या आरोग्य केंद्राशी संपर्क साधावा.- डॉ. अविनाश आहेरजिल्हा आरोग्य अधिकारी, वाशिम