रवींद्र साळवे -
मोखाडा : प्रेमसंबंधातून तरुणीचा कोयत्याने वार करून खून केल्यानंतर आरोपी तरुणाने स्वत:सुद्धा गळफास लावून आत्महत्या केल्याची घटना मोखाड्यात घडली आहे. गभालपाडा आश्रमशाळेत १२ वीत शिकणाऱ्या अर्चना उदार (१८) या तरुणीची शुक्रवारी सहा ऑक्टोबर रोजी भरदिवसा प्रेमप्रकरणातून धारधार कोयत्याने गळा चिरून हत्या करण्यात आली होती. यानंतर आरोपी प्रभाकर वाघरे (२२) हा फरार होता. पोलिसांकडून त्याचा शोध सुरू असताना त्याने त्याच्या गावालगत असलेल्या तुळ्याचापाडा डॅमवर पाणी सोडण्यात येणाऱ्या लोखंडी गेटला रात्रीच्या सुमारास गळफास लावून आत्महत्या केल्याची माहिती मोखाडा पोलिसांनी दिली.
मोखाडा तालुक्यातील रयत शिक्षण संस्थेची महर्षी विठ्ठल रामजी शिंदे प्राथमिक व माध्यमिक गभालपाडा आश्रमशाळा आहे. या आश्रमशाळेत वर्गखोल्या कमी असल्या कारणाने या आश्रमशाळेपासून ५०० ते ६०० मीटर लांब असलेल्या महाविद्यालयात येथील ११ वी व १२ वीचे विद्यार्थी यांना दररोज चालत नेण्यात येते. मात्र अशावेळी घोळक्याने किंवा शिक्षक यांच्यासोबत असतात. मात्र शुक्रवारी सकाळी मुली वर्ग संपवून जेवण्यासाठी पुन्हा महाविद्यालयाकडून आश्रमशाळेकडे येत असताना निर्मनुष्य असलेल्या कब्रस्तानच्या पाठीमागेच आरोपी प्रभाकर याने अर्चना हिला गाठले आणि धारदार कोयत्याने गळा चिरून हत्या केली.
प्रभाकर वाघरे यांच्या कुटुंबीयांनी अर्चना उदार हिच्याशी लग्न करण्यासाठी मागणी टाकली होती. मात्र उदार कुटुंबीयांनी ती अमान्य करत अर्चनाचा विवाह अन्य ठिकाणी निश्चित केला होता. याबाबत मनात राग धरून त्याने ही हत्या केल्याची शक्यता पोलिसांकडून व्यक्त करण्यात आली आहे.