बोर्डी : वांद्रे-वैष्णोदेवी कटरा स्वराज एक्स्प्रेस रविवारी दुपारी १ वाजून १० मिनिटांनी डहाणू रोड रेल्वे स्थानकात थांबविण्यात आली. यावेळी एस-४ आरक्षित स्लीपर क्लास कोचच्या शौचालयातून वीस वर्षीय तरुणीचा मृतदेह बाहेर काढण्यात आला. ती तरुणी बिहार येथील आरती कुमार असल्याचे तिच्याकडे सापडलेल्या आधारकार्डवरून समजले.
वांद्रे टर्मिनल्स येथून ही एक्स्प्रेस डहाणू रोड रेल्वे स्थानकात १ वाजून १० मिनिटांनी आल्यावर, रेल्वे प्रशासनाकडून शौचालयाचा दरवाजा उघडण्यासाठी सांगण्यात आले. मात्र प्रतिसाद न आल्याने दरवाजाची कडी तोडली असता, तरुणी बेशुद्धावस्थेत खाली पडली होती. बाजूला आधारकार्ड सापडले, त्यावर तिचा फोटो आणि आरती कुमार (वय २०) आणि बिहारची रहिवासी असल्याचे लिहिलेले होते. रेल्वे प्रशासनाच्या कर्मचाऱ्यांनी तिला डहाणू उपजिल्हा रुग्णालयात हलविले, परंतु त्यापूर्वीच तिचा मृत्यू झाल्याची माहिती रुग्णालयाकडून देण्यात आली. या घटनेची अपघाती मृत्यू अशी नोंद करून शवविच्छेदन करण्यात आले असून अहवाल प्राप्त झाला नव्हता.
दरम्यान, रविवारी सकाळी वांद्रे टर्मिनसवरून निघालेल्या स्वराज्य एक्स्प्रेसने बोरिवली स्थानक सोडल्यानंतर वीस वर्षीय युवती शौचालयात गेली होती. परंतु बराच वेळ उलटूनही ती बाहेर न आल्याचे लक्षात येताच काही प्रवाशांनी टीसीला माहिती दिली होती, अशी माहिती समोर आली आहे.