पालघरचे लाखभर मतदार यादीतून गायब : बविआ

बोगस मतदारांना रोखण्यासाठी आमचे कार्यकर्ते लक्ष ठेवून राहतील, असेही ते म्हणाले.

नालासोपारा : पालघर लोकसभा मतदारसंघाच्या यादीत मोठ्या प्रमाणात बोगस मतदार असून, या मतदारसंघात १ लाख ३५ हजार मतदारांची नावे नव्याने जमा झाली आहेत, तर एक लाखाहून अधिक मतदारांची नावे यादीतून गायब करण्यात आली आहेत, असा आरोप बहुजन विकास आघाडीचे आमदार क्षितिज ठाकूर यांनी केला आहे.विरारसारख्या बहुजन विकास आघाडीच्या बालेकिल्ल्यातील १८ वर्षांपासून मतदान करणाऱ्या कार्यकर्त्यांची नावे यादीतून वगळण्यात आली आहेत. हा प्रकार समोर आल्याने या सर्वांचा फायदा कोणाला होणार आहे? असा प्रश्न त्यांनी उपस्थित केला आहे. याबाबत निवडणूक अधिकाऱ्यांना विचारले असता चौकशी करू, बघू अशी टोलवाटोलवी ते करत आहेत. हे अधिकारी मतदान झाल्यानंतर चौकशी करणार आहेत का? असा प्रश्नही क्षितिज ठाकूर यांनी  केला. यामागे मोठे राजकीय पक्ष असल्याचा आरोप करत काहीही झाले तरीही पालघरची जागा आम्हीच जिंकू. बोगस मतदारांना रोखण्यासाठी आमचे कार्यकर्ते लक्ष ठेवून राहतील, असेही ते म्हणाले.