हालोली येथे खनिजाचे उत्खनन

वनपाल वनसंरक्षक हद्दीतील हलोली बोट येथील वन जमिनीतील लाखो ब्रास मातीचे राजरोसपणे बेकायदा उत्खनन होत असून वन कर्मचारी व अधिकारी यांनी याप्रकरणी बघ्याची भूमिका घेतली

मनोर : वनपाल वनसंरक्षक हद्दीतील हलोली बोट येथील वन जमिनीतील लाखो ब्रास मातीचे राजरोसपणे बेकायदा उत्खनन होत असून वन कर्मचारी व अधिकारी यांनी याप्रकरणी बघ्याची भूमिका घेतली आहे. येथील नदीकाठी असलेल्या वन जंगलातील साग, ऐन, बांबू आदी वृक्षांची अक्षरश: कत्तल झाली असून शासनाच्या ‘झाडे लावा. झाडे जगवा ’ मोहिमेचा फज्जा उडाला आहे.
सहायक वनसरंक्षक पालघर यांच्या कार्यक्षेत्रात येणाऱ्या मनोर वनपाल संरक्षक हद्दीमध्ये हा प्रकार झाला असून नदीकाठी असलेल्या जंगलातील अनेक झाडांची तोड करून वीट उत्पादकांना ही माती पुरविण्यात येत आहे. आजपर्यंत लाखो ब्रास मातीचे उत्खनन झाले असून वन अधिकाऱ्यांचा या प्रकाराला आशिर्वाद असल्याचे दिसून येत आहे. शासकीय धोरण वन संपदेबाबात संवेदनशील असल्याचे कागदोपत्री दिसत असले तरी बोट व आजूबाजूची खनिजसंपदा चोरीला जात असतांना कोणतीही कारवाई होत नाही याबाबत आश्चर्र्य व्यक्त होत आहे.
दिड दोन महिने अगोदर हलोली गावाच्या हद्दीत वन जमीनीचा वापर करून सक्शन पंप लावून, वैतरणा नदीतून रेती उत्खनन सुरू होते. त्यावेळी वनकर्मचारी व अवैध रेती काढणाऱ्या लोकांबरोबर बाचाबाची झाली. त्यावेळी गावकऱ्यांनी व वनपाल प्रियंका शिंदे, सहाय्यक वनसंरक्षक नंदकुमार कुपते यांनी हलोली कार्यालयात बसून तडजोड केली होती. त्यावेळीही कोणत्याही प्रकारची कारवाई केली गेली नाही. असे अनेक प्रकार दहीसरतर्फे मनोर वनपाल कार्यक्षेत्रात घडतात. असे स्थानिकांचे म्हणणे आहे. याबाबत प्रशासनाने कारवाई करणे गरजेचे आहे.
(वार्ताहर)