वसई : वसई रोड येथे एका अज्ञात वाहनचालकाने रस्त्यावर फिरणाऱ्या एका गरीब गायीला आपल्या चारचाकी वाहनाची जोरदार धडक देऊन स्वतः फरार होण्यात यशस्वी झाल्याचा धक्कादायक प्रकार बुधवारी दुपारच्या सुमारास पं. दीनदयाळ नगरात घडला आहे.
या भीषण अपघातात ही गरीब गाय जबर जखमी झाली असून तिच्या पायाला गंभीर दुखापत होऊन खूपच रक्तस्राव झाला आहे. दरम्यान घडल्या प्रकाराची माहिती पं दीनदयाळ नगरातील नागरिकांनी तात्काळ वसई विरार मनपाच्या अग्निशमन दलाच्या जवानांना कळविली असता घटनास्थळी अग्निशमन दलाच्या जवानांनी रेस्क्यू बेल्टच्या सहाय्याने त्या गायीला उचलून टेम्पोत ठेवून तिला वसई पूर्वेतील सकवार गावात असलेल्या गो शाळेत उपचारासाठी दाखल केली आहे.
परिणामी हा अपघात इतका भीषण होता की रस्त्यावर गाईच्या पायाला वाहनचालकाने दिलेल्या धडकेने रक्ताचा सडा सांडला आहे. मात्र, वाईट याचेच वाटते की इतकी जोरदार धडक दिली असताना या वाहनचालक व त्याच्या गाडीची नंबर प्लेट मात्र कोणीही बघितली नाही. त्यामुळे आता या गायीला नेमकी कोणी धडक दिली त्या वाहनचालकास शोधुन काढणं आणि त्याच्यावर कारवाई करणं हे माणिकपूर पोलिसांना एक आव्हानच ठरणार आहे.