(मंगेश कराळे)
नालासोपारा : शहरातील तुळींज रोड येथे मालवाहतूक वाहनाची दुचाकी व रिक्षा यांना जोरदार धडक लागून भीषण अपघात घडला आहे. सोमवारी सकाळी साडे आठच्या सुमारास ही घटना घडली. यात दुचाकीस्वाराचा जागीच मृत्यू झाला आहे. सुभाष प्रजापती (२९) असे मृत्यू झालेल्या व्यक्तीचे नाव आहे. तर दोन्ही रिक्षात बसलेले सात ते आठ प्रवासी जखमी झाले आहेत.
सुभाष प्रजापती हा सोमवारी सकाळी नेहमीप्रमाणे धानिवबाग येथून कामावर जाण्यासाठी निघाला होता. तुळींज रोड जवळील दामोदर सर्कल जवळ पोहचताच भरधाव वेगाने येत असलेल्या ट्रकची तीन रिक्षा एक मालवाहक टेम्पो व दुचाकीला जोरदार धडक दिली. या धडकेत सुभाष यांच्या डोक्याला गंभीर दुखापत झाल्याने त्याचा जागीच मृत्यू झाला आहे. तर रिक्षात बसलेले सात ते आठ प्रवासी यांना दुखापत होऊन ते जखमी झाले. या जखमींना घटनास्थळी उपस्थित असलेल्या नागरिकांनी जवळच्या रुग्णालयात उपचारासाठी नेण्यात आले. या अपघाती मृत्यू प्रकरणी तुळींज पोलीस ठाण्यात वाहनचालक गंगू वर्मा (३९) याच्या विरोधात गुन्हा दाखल करण्यात आल्याची माहिती तुळींज पोलिसांनी दिली आहे. याशिवाय जखमी पैकी एकच नोंद पोलिसात आतापर्यंत झाल्याचेही पोलिसांनी सांगितले आहे.