मंगेश कराळे -
Nalasopara Crime : नालासोपाऱ्याच्या गौराईपाड्याच्या वाढाण इंडस्ट्रीत कामावर जाणाऱ्या २२ वर्षीय तरुणीवर आरोपीने मंगळवारी सकाळी साडे आठच्या सुमारास दिवसाढवळ्या लोखंडी पान्याने वार करून निर्घृणपणे हत्या केल्याची धक्कादायक घटना घडली आहे. तरुणीचा मृत्यू झाल्यानंतरही आरोपीने अनेक वार केल्याचे प्रत्यक्षदर्शीनी सांगितले आहे. हत्या करून आरोपी मृतदेहा जवळ बसलेला असताना वालीव पोलिसांनी ताब्यात घेतले आहे.
तरुणीचा मृतदेह पंचनामा करून शवविच्छेदनसाठी पोलिसांनी पाठवला आहे. वालीव पोलिसांनी हत्येचा गुन्हा दाखल करून तपासाला सुरुवात केली आहे. आरती रामदुलार यादव (२२) असे हत्या झालेल्या तरुणीचे नाव आहे. तर रोहित रामनिवास यादव (२९) असे आरोपीचे नाव आहे. हत्या केल्यानंतर आरोपी मृतदेहाजवळ बसून होता. वालीव पोलिसांनी घटनास्थळी जाऊन आरोपीला ताब्यात घेतले आहे. सहा वर्षांपासून आरोपी तरुणीवर प्रेम करत होता. मागील एक महिन्यापासून तिच्या वागण्यात संशय येत असल्याने त्याने रागाच्या भरात हे निर्घृण कृत्य केल्याचे पोलिसांनी लोकमतला सांगितले.
सोशल मीडियावर या भयानक घटनेचा एक व्हिडिओ देखील व्हायरल होत आहे. व्हिडीओमध्ये तरुणाच्या हातात भलामोठा पाना दिसत असून शेजारी तरुणी पडलेली दिसत आहे. तिच्यावर पुन्हा हल्ला करण्यापूर्वी रोहित "क्यूं किया, क्यूं किया ऐसा मेरे साथ" असे ओरडताना ऐकू येत आहे. धक्कादायक बाब म्हणजे हा सगळा प्रकार होत असताना तिथे बरेच लोक उपस्थित होते. मात्र कोणीही हस्तक्षेप केला नाही आणि त्याला थांबवण्याचे धाडस केले नाही. अनेकजण तर या घटनेचा व्हिडीओ शूट करण्यात व्यस्त होते. लोकांच्या उपस्थितच रोहित आरतीवर वार करत होता. दुर्दैवाने, रक्ताच्या थारोळ्यात पडलेल्या आरतीला मदत करण्यासाठी कोणीही पुढे आलं नाही.