लोकमत न्यूज नेटवर्क
मीरारोड - मीरारोडच्या राम नगर भागात बड्या विकासकाने वाहनतळाच्या जागेत बांधलेल्या ९ दुकानांवर महापालिकेने तोडक कारवाई केली . यामुळे वाहनतळांच्या जागा रहिवाश्यांच्या हक्काच्या असताना त्यात बेकायदा दुकाने वा सदनिका बांधून विक्री करण्याचे प्रकार पुन्हा ऐरणीवर आले आहेत .
मीरारोडच्या राम नगर येथील पोलीस आयुक्तालयाच्या बाजूला असलेल्या इमारत क्र . ९ विकासक राम नगर डेव्हलपर्स यांनी विकसित केली आहे . इमारतीच्या तळमजल्यावर वाहनतळा साठी असलेले स्टील्ट खुले ठेवण्या ऐवजी ते बंदिस्त करून सुमारे १७०० चौ. फु . इतके बेकायदेशीर बांधकाम करण्यात आले होते .
स्टील्ट मध्ये ९ दुकाने व एक मीटर खोली बांधली असल्याने महापालिकेने अधिकारी - कर्मचारी व सुरक्षा रक्षकांचा मोठा फौजफाटा घेऊन २ जेसीबीच्या सहाय्याने सदर दुकानांची बांधकामे तोडली . या आधी देखील विकासकास पालिकेने लेखी पत्र दिली होती तसेच एमआरटीपी खाली कारवाई केली होती .
बांधकाम नकाशे मंजूर करताना त्यात स्टील्ट असेल तर ते मोकळेच ठेवणे बंधनकारक आहे . कारण स्टील्ट हे वाहने उभी करण्यासाठी वाहनतळ म्हणून सदनिका खरेदीदार रहिवाश्यांसाठी असते . परंतु अनेक विकासक हे स्टील्ट पार्किंग मध्ये गाळे वा सदनिका बांधून सर्रास त्याची बेकायदेशीर विक्री करून बक्कळ पैसा कमावतात .
विशेष म्हणजे महापालिका , लोकप्रतिनिधी आदीं कडून अश्या स्टील्ट पार्किंग मधील अनधिकृत बांधकामां कडे जाणीवपूर्वक दुर्लक्ष करणे नेहमीचे आहे . आधीच इमारतीं मध्ये वाहने उभी करण्यास जागा कमी असताना स्टील्ट मध्ये बेकायदा बांधकामे केल्याने वाहनतळांचा प्रश्न आणखी गंभीर बनत चालला आहे .