वर्धा : नागपूर-हैदराबाद राष्ट्रीय महामार्गावर पोलिसांच्या गाडीला अज्ञात वाहनाने जबर धडक दिली. ही घटना आज(दि. १७) पहाटे ५ च्या सुमारास घडली. या अपघातात तीन पोलीस कर्मचारी जखमी झाले असून त्यांना उपचारार्थ रुग्णालयता दाखल करण्यात आले आहे.
हिंगणघाट तालुक्यातील वडनेर पोलीस ठाण्याच्या हद्दीतील पिपरी (पोहणा) येथे बुधवारी रात्रीच्या सुमारास भरधाव वेगाने प्रवाशी घेऊन जात असलेल्या ट्रॅव्हल्सने बंद अवस्थेत उभ्या असलेल्या टिप्परवर मागून जबर धडक होऊन भीषण अपघात झाल्याची माहिती वडनेर पोलिसांना मिळाली. पोलिसांनी तत्काळ आपल्या वाहनाने अपघातस्थळी जाऊन पाहणी केली. दरम्यान आज पहाटे साडेपाच वाजताच्या सुमारास अपघातग्रस्त ट्रॅव्हल्सला परत घेऊन येत असताना अज्ञात वाहनाने पोलिसांच्या गाडीला मागून जोरदार धडक दिली.
या अपघात पोलीस वाहनचालक गणेश मेश्राम, पंढरी शेळके, खोडे जखमी झाले असून त्यांना वडनेर येथील ग्रामीण रुग्णालयात दाखल करण्यात आले आहे. सुदैवाने या अपघात कोणतीही जीवितहानी झाली नसली तरी पोलिसांच्या गाडीचे मोठ्या प्रमाणात नुकसान झाले आहे. या संबंधी वडनेर पोलिसांनी अज्ञात वाहनाविरोधात गुन्हा दाखल केला असून पुढील तपास वडनेर पोलीस करीत आहे.