वर्धा : पवनार येथील रहिवासी असलेल्या एका १४ वर्षीय मुलीचा बुधवारी सायंकाळच्या सुमारास पवनार शिवारातीच धाम नदीच्या शेजारी असलेल्या किल्ल्याच्या मागील भागात नग्न अवस्थेत मृतदेह सापडल्याने परिसरात एकच खळबळ उडाली होती. ही अल्पवयीन मुलगी शनिवारपासून घरून बेपत्ता होती. तशी तक्रार मुलीच्या आईने सेवाग्राम पोलीस ठाण्यात दाखल केली होती. या प्रकरणाचा पोलिसांनी छडा लावला असून, या मुलीची गावातीलच ३० वर्षीय तरुणाने गळा आवळून हत्या केल्याचे पुढे आले आहे.
शनिवारी सकाळी मुलीची आई कामावर जाताना मुलगी घरीच होती. तर दुपारी ५ वाजताच्या सुमारास मुलीची आई घरी परतल्यावर ती घरी दिसून आली नाही; पण याच दिवशी हनुमान जयंतीचा गावात कार्यक्रम असल्याने आपली मुलगी तेथे गेली असावी, असा अंदाज मुलीच्या आईने लावत ती रात्रीला झोपी गेली. दुसऱ्या दिवशी सूर्यादय होऊनही मुलगी घरी न परतल्याने मुलीच्या आईने शोधाशोध सुरू केली.
दरम्यान, मुलीच्या आईने गावातीलच सतीश जोगे याला मुलीचा शोध घेण्यासाठी विनंती केली. त्यानंतर पवनार येथील सैय्यद अहमद कबीर बाबाचे दर्गाहच्या मागील धाम नदीच्या गंगाडोहजवळ नदीशेजारी मुलीचे कपडे असल्याची माहिती मुलीच्या आईला फोनवरून दिली. तर बुधवारी या १४ वर्षीय मुलीचा मृतदेह धाम नदीच्या शेजारी असलेल्या किल्ल्याच्या मागील भागात नग्न अवस्थेत सापडला. घटनेची माहिती मिळताच पोलीस अधीक्षक प्रशांत होळकर, उपविभागीय पोलीस अधिकारी पीयूष जगताप, सेवाग्रामचे ठाणेदार नीलेश ब्राह्मणे यांनी आपल्या सहकाऱ्यांसह घटनास्थळ गाठले. घटनास्थळी ठसे तज्ज्ञांच्या चमूला पाचारण करण्यात आले होते.
पाच तासांनंतर सतीशने दिली कबुली
मुलीच्या आईची तक्रार प्राप्त झाल्यावर पोलिसांनी आपल्या तपासाला गती देत गोपनीय पद्धतीने अधिकची माहिती घेतली. दरम्यान, सेवाग्राम पोलिसांनी चौकशीसाठी पवनार येथील सतीश जोगे याला ताब्यात घेतले. सुरुवातीला उडवाउडवीचे उत्तरे देणारा सतीश तब्बल पाच तासांनंतर बोलता झाला. शिवाय त्याने आपणच या अल्पवयीन मुलीची गळा आवळून हत्या केल्याचा तसेच मृतदेह धाम नदीशेजारील बेशरमात फेकल्याची कबुली पोलिसांना दिली. त्यानंतर सेवाग्राम पोलिसांनी पवनार गाठून मृतदेह ताब्यात घेतला. संबंधित अल्पवयीन मुलगी सेलू येथील यशवंत विद्यालयात नववीचे शिक्षण घेत होती.