भटक्यांच्या झोपड्याही झाल्या हायटेक

दिवसभर काम करून थकलेल्या शरीराला आरामासोबतच मनोरंजनाचीही आवश्यकता असते. दूरदर्शनच्या विस्ताराने सर्वत्र मनोरंजनाची भूक भागत आहे.

डिजीटल इंडियाचा नारा : मनोरंजनासाठी झोपडीबाहेर डीटीएच छत्री
पराग मगर वर्धा
दिवसभर काम करून थकलेल्या शरीराला आरामासोबतच मनोरंजनाचीही आवश्यकता असते. दूरदर्शनच्या विस्ताराने सर्वत्र मनोरंजनाची भूक भागत आहे. याला आता भटक्या जमातींच्या झोपड्याही अपवाद राहिलेल्या नाही. एकीकडे जिल्ह्यात सेट टॉप बॉक्सअभावी नागरिकांच्या टीव्हींवर मुंग्या येण्याची वेळ आली असताना झोपड्यांमध्ये मात्र डीटीएचच्या माध्यमातून मनोरंजनाचा पर्याय शोधला जात आहे.
गावागावात, शहरांत रस्त्याच्या कडेला झोपडी बांधून भटक्या जमाती आपली राहण्याची तात्पुरती सोय करीत असतात. यातील काही जमातींचे पाल हे महिन्या-महिन्याला बदलत असतात तर काही जमाती अनेक महिने एकाच ठिकाणी आपले पाल ठोकतात. झोपडींसाठी आता व्यवस्थित अश्या कापडाचा वापर होताना दिसतो. दिवसभर राबराब राबून या नागरिकांना पोटाची खळगी भरावी लागते. त्यांची लहान मुलेही कामात हातभार लावतात. शिक्षणाचा पत्ता नसलेली लहान मुले आर्इंसोबत सरपणाची सोय करण्यासाठी दिवसभर हिंडत असतात.
यातील सर्वांचिच परिस्थिती बेताची असते असे नाही. काहींचा प्रपंच व्यवस्थित सुरू असतो. सर्वच दिवस कामाचे असतातच असेही नाही. त्यामुळे काम नसताना स्वत:चे मनोरंजन कसे करावे काहींना प्रश्न असतो. त्यावर उपाय म्हणून आता भटक्यांच्या झोपडींमध्ये टिव्ही दिसत आहे. एवढेच नव्हे तर गावोगावी भटकावे लागत असल्याने केबलची झंझटच नको असे म्हणून सरळ डीटीएचच्या माध्यमातून चॅनल्स पाहिल्या जात आहेत.
त्यामुळे ये-जा करताना या झोपड्यांबाहेर डीटीएचची छत्री पाहून नागरिकही अचंबित होत असतात. काही स्वत:ची परिस्थिती पाहून खजीलही होतात. पण एकंदरित डिजीटल इंडियाचा नारा पाहता या झोपड्याही हायटेक होत असल्याचे दिसते.

टीव्ही पाहण्यासाठी बॅटरींचा वापर
सर्वप्रथम झोपड्यांमध्ये टीव्ही व बाहेर डीटीएच छत्री पाहून जवळच्या तारांवर आकोडा तर टाकला नाही ना असा संशय येतो. पण असे नसून सरळ मोठ्या बॅटरी घेऊन त्यांनी टीव्ही पाहण्याची कायमची सोय केली आहे. १०० रुपये देऊन ही बॅटरी संपल्यावर चार्ज करून आणतात.
खरा डिजीटल इंडिया
भारतभर डिजीटल इंडियाचा नारा दिला जात आहे. अशा वेळी ग्रामीण भागात याचा प्रचार आणि प्रसार करण्यावरही भर दिला जात आहे. अश्या वेळी या झोपड्यांमधील डीटीएच सुविधा पाहून हाच खरा डिजीटल इंडिया असा प्रत्यय आल्यावाचून राहात नाही.