गॅस सिलिंडरचा स्फोट

गुढीपाडव्याच्या दिवशी रात्री स्वयंपाकाकरिता गॅस पोटविताना गॅसच्या गळतीमुळे सिलिंडरने पेट घेतला.

बरबडी येथील घटना : आगीत घर खाक
समुद्रपूर : गुढीपाडव्याच्या दिवशी रात्री स्वयंपाकाकरिता गॅस पोटविताना गॅसच्या गळतीमुळे सिलिंडरने पेट घेतला. आगीच्या भीतीमुळे घरातील लोकांनी बाहेर पळ काढताच सिलिंडरचा स्फोट झाला. यामुळे लागलेल्या आगीत घरातील सर्वच साहित्याचा कोळसा झाला. आगीत सुमारे ५ लाख रुपयांचे नुकसान झाल्याचा प्राथमिक अंदाज वर्तविण्यात आला आहे. ही घटना तालुक्यातील बरबडी येथे शुक्रवारी रात्री ८ वाजताच्या सुमारास घडली.
प्राप्त माहितीनुसार, रामभाऊ बरडे (५५) यांची पत्नी स्वयंपाक कारण्याकरिता स्वयंपाकघरात गेली होती. यावेळी सिलिंडरला रेग्युलेटरपासून झालेल्या गॅस गळतीमुळे आग लागल्याचे त्यांच्या लक्षात आले. आग दिसताच बरडे यांची पत्नी, त्यांची आई व मुले घराबाहेर पडले. ते घराबाहेर निघताच सिलिंडरचा स्फोट झाला. त्यामध्ये संपूर्ण घर जळून खाक झाले.
या आगीत घरातील १० क्विंटल तूर, ३ पोते गहू, तांदूळ, दाळ, टीव्ही, फ्रीज, कुलर आदी साहित्याचा कोळसा झाला. तर कपाटात ठेवलेले सोने-चांदीचे १ लाख २० हजाराचे दागिने व रोख ४० हजार रुपये रोख आगीच्या भक्षस्थानी आले. यात पाच लाख रुपयांचे नुकसान झाले.
बरडे यांना भूदानचे तीन एकर शेत मिळाले होते. त्याला मदत म्हणून त्यांनी काही शेत भाडेतत्त्वावर घेतले. यातून निघणाऱ्या उत्पन्नावर त्यांचा उदरनिर्वाह चालत होता. या आगीत घरातील सर्वच साहित्याचा कोळसा झाला. आगीची माहिती मिळताच भारत तिजारे, अनिल घोडे, विठ्ठल साबळे, मोहन चिडे, गोपाल वंगल, अरविंद घोडे, अमर बोरकर, राजू तिजारे, राजू बोरकर यांच्यासह गावकऱ्यांनी आग विझविण्यासाठी प्रयत्न केले. पण आग आटोक्यात येण्याऐवजी ती वाढतच गेली. संपूर्ण घर कवेत घेतल्यानंतरच आग आटोक्यात आली. घटनेची माहिती मिळताच तलाठी गजानन गराड यांनी घटनास्थळ गाठत पंचनामा केला.(तालुका प्रतिनिधी)