स्वत:च्या व कुटुंबाच्या आरोग्यासाठी प्रत्येकाने ‘नो व्हेईकल डे’ पाळावा!

वर्धेकरांनी दर गुरुवारी ‘नो व्हेईकल डे’ पाळण्याचा केलेला निर्धार स्वागतार्ह आहे. प्रत्येक नागरिकांनी स्वत:सह कुटुंबाच्या व

वर्धा : वर्धेकरांनी दर गुरुवारी ‘नो व्हेईकल डे’ पाळण्याचा केलेला निर्धार स्वागतार्ह आहे. प्रत्येक नागरिकांनी स्वत:सह कुटुंबाच्या व शहराच्या आरोग्यासाठी हा दिवस नियमितपणे पाळावा, असे आवाहन जिल्हाधिकारी आशुतोष सलील यांनी वर्धेकरांना सोमवारी केले. या उपक्रमात शाळा-महाविद्यालयातील विद्यार्थ्यांनीही स्वयंस्फूर्तीने सहभागी व्हावे, अशी आशही त्यांनी यावेळी व्यक्त केली.
पर्यावरण आणि वर्धेकरांच्या आरोग्याच्या दृष्टीने ‘लोकमत’ने ‘नो व्हेईकल डे’साठी सातत्याने पाठपुरावा केला. रविवारी ३२ च्यावर संघटनांच्या पदाधिकारी व सदस्यांनी हा उपक्रम राबिवण्यासाठी प्रत्येक आठवड्याचा ‘गुरुवार’ या दिवसाची निवड केली. या उपक्रमाला वर्धेतील सर्व स्तरातून वाढता उत्स्फूर्त प्रतिसाद आहे. जिल्हा प्रशासनानेही या उपक्रमात सहभागी व्हावे, याबाबतचा प्रस्ताव आम्ही वर्धेकरचे संजय इंगळे तिगावकर, नाट्यदिग्दर्शक हरीश इथापे आणि वैद्यकीय जनजागृती मंचचे डॉ. सचिन पावडे यांनी आज जिल्हाधिकारी आशुतोष सलील, पोलीस अधीक्षक अंकित गोयल आणि जिल्हा परिषदेचे मुख्य कार्यकारी अधिकारी संजय मीणा यांची प्रत्यक्ष भेट घेऊन त्यांच्या समक्ष ठेवला. या प्रस्तावाचे तिनही अधिकाऱ्यांनी स्वागत करून ‘लोकमत’च्या या उपक्रमाचे स्वागत करीत आपणही यंत्रणेसह या उपक्रमात सहभागी असल्याचे सांगितले. या उपक्रमासाठी आवश्यक ती मदतही करण्याचे ते म्हणाले. नागरिकांनीही हा उपक्रम आपल्यासाठी आहे हे गृहीत धरुन यामध्ये दर गुरुवारी सहभागी व्हावे, आणि हा दिवस साजरा करून वर्धेकरांनी इतरही जिल्ह्यांपुढे आदर्श ठेवावा, असे आवाहनही या अधिकाऱ्यांनी यावेळी केले.(जिल्हा प्रतिनिधी)