डॉ. आंबेडकर यांच्या शतकोत्तर रौप्य जयंती महोत्सवाची जिल्ह्यात जय्यत तयारी

भारतीय राज्य घटनेचे शिल्पकार भारतरत्न डॉ. बाबासाहेब आंबेडकर यांचा १२५ चा शतकोत्तर रौप्य जयंती महोत्सव....

वर्धेत चार दिवसीय महोत्सव : प्रबोधनात्मक कार्यक्रम
वर्धा : भारतीय राज्य घटनेचे शिल्पकार भारतरत्न डॉ. बाबासाहेब आंबेडकर यांचा १२५ चा शतकोत्तर रौप्य जयंती महोत्सव जिल्ह्यात व्यापक स्वरुपात साजरा करण्यात येणार असून या अनुषंगाने जय्यत तयारी सुरू आहे. वर्धेत डॉ. बाबासाहेब आंबेडकर जयंती उत्सव समितीच्यावतीने ११ ते १४ एप्रिलपर्यंत स्थानिक पोलीस ग्राऊंड येथे भव्य स्वरुपात जयंती महोत्सव साजरा करण्यात येत आहे. चार दिवस विविध प्रबेधनात्मक कार्यक्रमांचे आयोजन करण्यात आले आहे. या अनुषंगाने शहरातील मुख्य रस्ते व शहरातील थोरांच्या पुतळ्यांचा परिसर रोषणाईने सजविण्यात येत आहे.
सोमवारपासून (दि.११) या उत्सवाला प्रारंभ होणार आहे. उद्घाटक म्हणून निवृत्त आय.ए.एस. अधिकारी इ.झेड. खोब्रागडे, तर प्रमुख अतिथी म्हणून आंबेडकरी चळवळीचे अभ्यासक सुनील कदम, आयबीएन लोकमतचे सिनियर प्रोड्यूसर विनोद राऊत व आंबेडकर विचारवंत अ‍ॅड. प्रेम ताकसांडे उपस्थित राहतील.

देखाव्यातून घडणार बाबासाहेबांच्या जीवनचरित्राचे दर्शन
डॉ. बाबासाहेब आंबेडकर यांच्या जीवनचरित्रावर आधारित देखावा या महोत्सवाचे विशेष आकर्षण असणार आहे. डॉ. आंबेडकर चौकात हा देखावा साकारण्यात येणार आहे. दि.११ ते १४ एप्रिलपर्यंत तो सर्वांसाठी खुला राहणार आहे.
शहरात रोषणाई, सर्वधर्म समभावाचा संदेश
डॉ. बाबासाहेब आंबेडकर यांच्या शतकोत्तर जयंती महोत्सवानिमित्त जय्यत तयारी सुरू आहे. डॉ. बाबासाहेबांच्या पुतळा परिसराला आकर्षकरित्या सजविण्यात येत आहे. शहरातील मुख्य मार्गावर रोषणाई करण्यात आली आहे. यामुळे रात्रीला झगमगाटात शहराचे सौंदर्य खुलून दिसणार आहे. शिवाय शहरातील थोर मानवांच्या पुतळ्यांनाही रोषणाई करण्यात आल्यामुळे सर्वधर्म समभावाचा संदेशही यातून दिला जात आहे.