वर्धा : मुक्या जनावरांप्रति सर्वांनाच प्रेम असते. मात्र, मानवतेला काळिमा फासणारी अशी एक घटना देवळी शहरात रविवारी २१ ऑगस्ट रोजी घडली. शहराचा मुख्य चौक समजल्या जाणाऱ्या ठाकरे चौकात मध्यरात्री ११.१५ वाजताच्या सुमारास एका माथेफिरूने चक्क गर्भवती श्वानाच्या पोटात चाकू भोसकून निर्दयीपणे हत्या केली. या घटनेला दोन दिवस उलटूनही एकाही प्राणिमित्राने किंवा संघटनेने दखल न घेणे ही शोकांतिकाच म्हणावी लागले. या क्रूरतेमुळे समाजमनही सुन्न पडले.
रविवार, २१ ऑगस्टच्या रात्री ११ वाजून १९ मिनिटांनी लाल टीशर्ट घातलेला अज्ञात माथेफिरू ठाकरे चौकात आला. त्याच्या हातात चाकू होता. तो जोरजोरात ओरडत होता. त्याने रस्त्याकडेला झोपून असलेल्या गर्भवती श्वानाच्या पोटात चाकूने सपासप वार करून श्वानाची निर्दयीपणे हत्या केली. प्रत्यक्षदर्शी असलेल्या नागरिकांनी त्या माथेफिरूला हटकले असता हल्लेखोराने चाकूचा धाक दाखवत गोल्हर गल्लीकडे पळून गेला. या घटनेला दोन दिवसांचा कालावधी उलटला असून, अद्याप जिल्ह्यात सक्रिय असलेल्या प्राणिमित्र संघटना तसेच विविध संघटनांनी याची दखल घेतली नसल्याने आश्चर्य व्यक्त होत आहे.
अन् रक्ताच्या थारोळ्यात पडून होती ‘ती’
अज्ञात माथेफिरूने श्वानाच्या पोटावर चाकूने वार केल्यानंतर श्वानाने जीव वाचविण्याच्या प्रयत्नात पळ काढला. मात्र, काही अंतर दूरवर जाताच अतिरक्तस्रावाने श्वान जमिनीवर कोसळला आणि जागीच श्वानाचा मृत्यू झाला. या घटनेने शहरात चांगलीच खळबळ उडाली.
अवघ्या ५० मीटर अंतरावर पोलीस ठाणे तरीही...
ज्या ठाकरे चौकात ही क्रूर घटना घडली तेथून पोलीस ठाणे अवघ्या ५० मीटर अंतरावर आहे. हातात खुलेआम चाकू घेऊन एक माथेफिरू परिसरात धिंगाणा घालतो आणि पोलिसांना याची भनक लागत नाही ही मोठी शोकांतिका आहे.
संपूर्ण घटनाक्रम सीसीटीव्हीत कैद
माथेफिरू हातात चाकू घेऊन ठाकरे चौकात धुमाकूळ घालताना तसेच रस्त्याकडेला झोपून असलेल्या श्वानाच्या पोटात चाकूने सपासप वार करतानाचा संपूर्ण घटनाक्रम सीसीटीव्ही कॅमेऱ्यात कैद झाला आहे. पोलिसांनी बँक ऑफ बडोदा येथे लागलेल्या सीसीटीव्ही कॅमेऱ्यांची तपासणी केल्यास माथेफिरू हल्लेखोराची ओळख पटू शकते, अशी मागणी नागरिकांतून केली जात आहे.
हिंगणघाटातही घडली होती अशीच घटना
श्वानाने कोंबडी खाल्ली म्हणून तिघांनी श्वानाला ठार मारून त्याची परिसरातून धिंड काढून क्रूरतेचा कळस गाठला होता. टिळक वॉर्ड परिसरात ही घटना घडली होती. या प्रकरणात तिन्ही आरोपींविरुद्ध प्राण्यांचा छळ प्रतिबंधक अधिनियम कायदा १९६० अंतर्गत कलम ११ (१)(ड) कलमान्वये गुन्हा दाखल करण्यात आला होता.
ही घटना निर्दयीच...
श्वानाच्या पोटावर वार करून हत्या केल्याची घटना निर्दयीच आहे. यासंदर्भातील सीसीटीव्ही फुटेज प्राप्त झाले आहे. त्यावरून देवळी येथील पोलीस निरीक्षकांना अज्ञाताविरुद्ध गुन्हा दाखल करण्याच्या सूचना दिल्या असून गुन्हा दाखल करण्यात आला.
- यशवंत सोळंके, अप्पर पोलीस अधीक्षक, वर्धा