आंजी ग्रा.पं.करिता ७५ टक्के मतदान

वर्धा तालुक्यातील आंजी (मोठी), पवनूर व पुजई येथे पोटनिवडणूक होती. याकरिता रविवारी मतदान झाले. यात आंजी

आंजी (मोठी) : वर्धा तालुक्यातील आंजी (मोठी), पवनूर व पुजई येथे पोटनिवडणूक होती. याकरिता रविवारी मतदान झाले. यात आंजी ग्रामपंचायतीत एका वॉर्डाकरिता ७५ टक्के मतदान झाले. मतदानाची प्रक्रिया शांततेत पार पडली. येथे एकूण १,१६१ मतदानापैकी ८६५ मतदारांनी मतदानाचा हक्क बजावला.
वॉर्ड क्रमांक १ मधील सुनील सावळे यांनी राजीनामा दिल्याने ही पोटनिवडणूक झाली. या पोटनिवडणुकीत सत्ताधारी गटाचे अशोक बोरसरे तर विरोधी गटाचे दीपक बावणकर याच्यात सरळ लढत झाली. असे असले तरी येथे सरपंच जगदीश संचेरीया विरूद्ध माजी सरपंच दीपक बावणकर अशी अप्रत्यक्ष लढत होती. यात दोन्ही गटांची प्रतिष्ठा पणाला होती.
मतदान संपल्यानंतर मतदान केंद्रावर प्रतिनिधी म्हणून कार्यरत असलेल्या एकाच्या मतदानावरून दोन्ही गटातील उमेदवारांच्या प्रतिनिधीमध्ये शाब्दीक चकमक झाली. निवडणूक अधिकाऱ्यासह सहाय्यक पोलीस उपनिरीक्षक विनोद राऊत, जमादार दिनेश गायकवाड, शिपाई वैभव चरडे, घवघवे यांच्या मध्यस्थीने वाद निवळला. यामुळे पोलिसात कुठलीही तक्रार करण्यात आली नाही.(वार्ताहर)

पवनूर येथे ६९.४२ टक्के मतदान
४पवनूर येथे केशव कडू यांच्या मृत्यूमुळे रिक्त झालेल्या जागेकरिता झालेल्या पोटनिवडणुकीत ६९.४२ टक्के मतदान झाले. यात ५०७ पैकी ३५२ मतदारांनी मतदानाचा हक्क बजावला. येथे सत्तापक्षाचे सुभाष कडू व लक्ष्मण कोंडलकर यांच्यात सरळ लढत आहे.
पुजई येथे ७२.२२ टक्के मतदान
४पुजई ग्रा.पं.करिता ७२.२२ टक्के मतदान झाले. येथे २८८ पैकी २०८ नागरिकांनी मतदान केले. येथे शांततेत मतदान झाले.