ठाणे - ठाणे शहरातील नौपाडा कोपरी प्रभाग समिती अंतर्गत कोपरीतील धोबीघाट जलकुंभाची ३०० मिमी व्यासाची मुख्य वितरण जलवाहिनी साईतीर्थ टॉवर येथे आणि बारा बंगला सर्कल येथील धनेश्वर मंदिर येथे सॅटिस प्रकल्पाच्या कामांतर्गत बाधित झाली आहे. त्यामुळे ती स्थलांतरित करणे आवश्यक आहे. याच कामासाठी २७ मे रोजी सकाळी ९ ते २८ मे २०२२ रोजी सकाळी ९ वाजेपर्यंत २४ तास पाणीपुरवठा बंद राहणार असल्याची माहिती महापालिका प्रशासनाने बुधवारी दिली.
या शटडाऊनमुळे ठाणे पूर्वेकडील संपूर्ण कोपरी परिसरातील सिद्धार्थनगर, शांतीनगर, चेंदणी कोळीवाडा, साईनगरी, साईनाथनगर मस्ताननगर, ठाणेकरवाडी, कोपरी गाव, धोबीघाट, नातू परांजपे कॉलनी, स्टेशन परिसर, आदर्शनगर, सुदर्शन कॉलनी, आनंदनगर, गांधीनगर, कानेवाडी, सिद्धिविनायक नगर, केदारेश्वरनगर तसेच नवजीवन सोसायटी, आदी परिसराचा पाणी पुरवठा या कालावधीत पूर्णपणे बंद राहणार आहे. या शटडाऊनमुळे पाणीपुरवठा पूर्वपदावर येईपर्यंत पुढील एक ते दाेन दिवस कमी दाबाने पाणीपुरवठा होण्याची शक्यता आहे. तरी नागरिकांनी पाण्याचा साठा करून याेग्य प्रकारे पाण्याचा विनियाेग करावा, असे आवाहन ठाणे महापालिकेने केले आहे.