- नितीन पंडित भिवंडी - नववर्षाच्या स्वागताकरीता शिर्डी येथील साईबाबांच्या दर्शनासाठी मुंबई भांडुप येथुन दुचाकी वरून निघालेल्या दांपत्याच्या दुचाकीला भिवंडी परिसरातील मुंबई नाशिक महामार्गावर कंटेनरने धडक दिल्याने झालेल्या अपघातात पती पत्नी दोघांचेही दुर्दैवी निधन झाले आहे.सुदैवाने या अपघातामध्ये दुचाकी वरील सहा वर्षाची चिमुकली मृण्मयी बचावली असून ती सुखरूप आहे.
मनोज सोमा जोशी वय ३६ व मानसी मनोज जोशी वय ३४ रा.तानाजी वाडी,टेंभीपाडा भांडुप पश्चिम असे मयत दांपत्याचे नाव आहे. भांडुप पश्चिम येथील तानाजी वाडी चाळीतील रहिवाशांनी नववर्षात साईबाबांच्या दर्शनाचा बेत आखला होता.व त्यासाठी शुक्रवारी तेथील असंख्य कुटुंबीय दुचाकीवर तर काही मिनी बस मधून शिर्डी येथे जाण्याकरता सकाळी साडेसात वाजता निघाले.या चाळीतील मनोज जोशी व त्यांची पत्नी मानसी व मुलगी मृण्मयी असे तिघे आपल्या सुझुकी एक्सेस मोटर सायकलने शिर्डी दर्शन करता निघाले असता, भिवंडी तालुका पोलीस ठाणे हद्दीत मुंबई नाशिक महामार्गावर येवई ते वडपा यादरम्यान नाशिकच्या दिशेने जात असताना एका कंटेनरच्या चालकाने कंटेनर भरधाव बेजबाबदारपणे चालवुन दुचाकीस मागून धडक दिली.ज्यामध्ये दुचाकीवरील हे जोशी दाम्पत्य कंटेनरच्या मागील चाकात आले आणि घटना स्थळीच त्यांचा दुर्दैवी मृत्यू झाला.सुदैवाने त्यांची सहा वर्षाची चिमुकली मृण्मयी ही गाडीवरून विरुद्ध दिशेला पडल्यामुळे तिला कोणतीही दुखापत न होता ती या अपघातातून बचावली आहे.
या घटने नंतर भिवंडी तालुका पोलीस स्टेशनचे वरिष्ठ पोलीस निरीक्षक दत्तात्रय बोराटे हे आपल्या पोलीस पथकासह घटनास्थळी दाखल होत त्यांनी कंटेनर चालक कपिल राजाराम देव यास ताब्यात घेतले.घटनास्थळाचा पंचनामा करून मृतदेह शवविच्छेदनासाठी शासकीय रुग्णालयात रवाना केले.तर मनोज जोशी या सोबत निघालेला शेजारी विक्रांत पायरे यांनी दिलेल्या फिर्यादी वरून कंटेनर चालका विरोधात गुन्हा दाखल करण्यात आला असून या अपघात गुन्ह्याचा तपास वरिष्ठ पोलीस निरीक्षक दत्तात्रय बोराटे हे करीत असून या दुर्दैवी अपघाती घटनेनंतर अनेकांकडून हळहळ व्यक्त केली जात आहे.