डोंबिवली : रिक्षाचा दुचाकीला धक्का लागल्याच्या कारणावरून झालेल्या वादातून तिघांना हॉकीस्टीक व लाकडी दांडक्याने मारहाण केल्याची घटना मंगळवारी रात्री गोळवली परिसरात घडली. याप्रकरणी मानपाडा पोलीस ठाण्यात चौकडीविरोधात गुन्हा दाखल झाला आहे.
पूर्वेतील गोळवली परिसरातील पांडुरंगवाडी येथे राहणारा अनिकेत सातपुते (१८) याचे मेव्हुणे अश्विन कांबळे यांनी घराजवळ रिक्षा उभी केली होती. त्यावेळी त्यांच्या रिक्षाच्या मागे शेजारी राहणाऱ्या भारत लाला चव्हाण याने त्याची दुचाकी उभी केली. थोड्यावेळाने रिक्षा काढायला गेलेल्या कांबळे यांच्या रिक्षाचा धक्का भारतच्या दुचाकीला लागला. त्यामुळे दुचाकी खाली पडली. यावरून या दोघांमध्ये शाब्दीक बाचाबाची झाली. त्यानंतर रात्री ९ च्या सुमारास भारत, त्याचा भाऊ अरुण, भारतची मुले अनिल आणि सुनील यांनी कांबळे यांना शिवीगाळ केली. तसेच भारतने हॉकीस्टिकने अनिकेतला मारहाण केली. त्यावेळी भांडण सोडविण्यास गेलेल्या अनिकेतचा काका भैय्यासाहेब आणि त्याच्या बहिणीलाही लाकडी दांडक्याने मारहाण करण्यात आली. याप्रकरणी अनिकेतने मानपाडा पोलिसात तक्रार दिली. त्यानुसार पोलिसांनी भारत चव्हाण, अरुण, अनिल आणि सुनील यांच्याविरोधात गुन्हा दाखल केला आहे.