ठाणे: मोटारसायकलीवरुन जाणाऱ्या मोहम्मद इस्लाम बंजारा (३४, रा. बगदाद मार्केट, कलीना रोड, कुर्ला, मुंबई) या चालकाचे नियंत्रण सुटल्यामुळे त्याच्यासह मागे बसलेल्या अब्दुल गफार नबी बंजारा (४९, रा. कुर्ला) या दोन्ही फेरीवाल्यांचा मृत्यू झाल्याची घटना माजीवडा गोल्डन डाईज नाका येथे घडली. याप्रकरणी चालक असलेल्या मोहमद बंजारा याच्याविरुद्ध गुन्हा दाखल झाल्याची माहिती कापूरबावडी पोलिसांनी गुरुवारी दिली.
ठाण्यातील घोडबंदरकडून नाशिककडे जाणाऱ्या उड्डाणपूलावरील वळणाजवळ गोल्डन डाईज नाका या मार्गावरुन मोहंमद इस्लाम आणि अब्दुल बंजारा हे दोघेजण एकाच मोटारसायकलीवरुन बाळकूम ते नाशिकच्या मार्गावर ५ जून रोजी पहाटे ४.१५ वाजण्याच्या सुमारास जात होते. त्याचवेळी मोटारसायकल चालविणाऱ्या अब्दुल याचा ताबा सुटल्याने त्यांची मोटारसायकल उड्डाण पूलाच्या बाजूला असलेल्या कठडयाला जोरदार धडकली. याच अपघातात अब्दुल आणि त्याच्या मागे असलेला मोहंमद या दोघांच्याही डोक्याला गंभीर मार लागला. यात दोघांनाही वाहतूक नियंत्रण शाखेच्या पोलिसांनीठाणे जिल्हा शासकीय रुग्णालयात उपचारासाठी दाखल केले. मात्र, उपचारापूर्वीच त्यांचा मृत्यू झाल्याचे डॉक्टरांनी घोषित केले. याप्रकरणी कापूरबावडी पोलिस ठाण्यात गुन्हा दाखल झाला आहे.
सहायक पोलिस निरीक्षक संतोष पिंपळे हे याप्रकरणी अधिक तपास करीत आहेत.