अंबरनाथ : राजकारणात आमदार, खासदार, उपमुख्यमंत्री, मुख्यमंत्री अशी पदे असतात. पण राजकीय अधिष्ठानापेक्षा आध्यात्मिक अधिष्ठान हे आजही आमच्यासाठी श्रेष्ठ आहे. त्या अधिष्ठानाचा आम्ही आदर करतो, असे मत मुख्यमंत्री एकनाथ शिंदे यांनी मंगळवारी व्यक्त केले.
ठाणे-रायगड जिल्ह्यातील वारकरी आणि भागवत संप्रदायांतर्फे आणि खासदार डॉ. श्रीकांत शिंदे यांच्या पुढाकाराने श्री मलंगगडाच्या पायथ्याशी आयोजित राज्यस्तरीय श्री मलंगगड अखंड हरिनाम सप्ताहाची सुरुवात झाली. यावेळी प्रमुख अतिथी म्हणून मुख्यमंत्री शिंदे उपस्थित होते. टाळ-मृदंगाच्या गजरात वारकऱ्यांच्या दिंडीला सुरुवात झाली. दिंडीमध्ये मुख्यमंत्री शिंदे यांनी सहभाग घेतला. टाळ आणि हरिनामाचा गजर करत त्यांनीही वारकऱ्यांचा उत्साह वाढवला. राज्यस्तरीय हरिनाम सोहळ्याला आचार्य प्रल्हाद महाराज शास्त्री, विश्वनाथ वारींगे महाराज, चेतन महाराज, दिगंबर शिवनारायण जी, विष्णुदादा मंगरुळकर, संतोष चांगो देशेकर, गोपाळ जी, शंकर गायकर, दिनेश देशमुख यांच्यासह अनेक साधू, महंत मोठ्या संख्येने उपस्थित होते.
श्री मलंगगडाबाबतची लोकभावना पूर्ण करणार धर्मवीर आनंद दिघे यांनी सुरू केलेल्या मलंगगडमुक्तीच्या आंदोलनाचे आम्ही साक्षीदार असून श्री मलंगगडाबाबतची लोकभावना आमच्या लक्षात असून काही गोष्टी आपण जाहीरपणे सांगू शकत नाही. मात्र आपल्या सर्वांच्या मनात असणारी मलंगगडमुक्तीची भावना पूर्ण केल्याशिवाय आपण स्वस्थ बसणार नाही, अशी ग्वाही मुख्यमंत्री शिंदे यांनी मंगळवारी दिली.
हेलिकॉप्टरमधून पुष्पवृष्टी या हरिनाम सप्ताहातील उद्घाटन समारंभात मुख्य आकर्षण ठरला, रिंगण सोहळा. पंढरपूरप्रमाणे साजऱ्या झालेल्या या रिंगण सोहळ्यात मुख्यमंत्री शिंदे हाती टाळ घेऊन सहभागी झाले. यावेळी हेलिकॉप्टरमधून रिंगण सोहळ्यावर पुष्पवृष्टी करण्यात आली.
मुख्यमंत्र्यांच्या हाती भागवत धर्माची पताका मुख्यमंत्री एकनाथ शिंदे यांच्यासोबत कल्याण लोकसभेचे खासदार डॉ. श्रीकांत शिंदे यांना या रिंगण सोहळ्यात भागवत धर्माची पताका घेऊन रिंगण सोहळ्यातील ज्ञानेश्वर माऊलींच्या अश्वापुढे धावण्याचा मान मिळाला.