महाराष्ट्र नव निर्माण सेनेचे अध्यक्ष राज ठाकरे यांनी पुन्ह एकदा 'लाव रे तो व्हिडिओ' म्हणत, आता उद्धव ठाकरे यांना निशाण्यावर घेतले आहे. यावेळी राज यांनी थेट शिवसेनेच्या (ठाकरे गट) नेत्या सुषमा अंधारे यांचा व्हिडिओ दाखवत, 'तुम्ही म्हणताना माझे वडील चोरले, माझे वडील चोरले, त्या वडीलांबद्दल एवढं प्रेम आहे. मग, बाळासाहेबांवर टीका करणाऱ्या या व्यक्तीला तुम्ही तुमच्या पक्षाची प्रवक्ती करता? तुम्ही तुमच्या पक्षाचा नेता करता? आणि तुमच्या वडलांवर प्रेम आहे म्हणून सांगता?" अशा शब्दात राज ठाकरे यांनी उद्धव ठाकरे यांच्यावर रविवारी ठाण्यातील सभेतून जहरी टीका केली. ते श्रीकांत शिंदे आणि नरेश म्हस्के यांच्या प्रचारार्थ आयोजित सभेत बोलत होते.
राज ठाकरे म्हणाले, "आज कोण-कुणावर बोलतोय आणि कोण कुणावर आरोप करतंय, सगळं सोडून द्या. अरे, तुम्ही म्हणताना माझे वडील चोरले, माझे वडील चोरले, त्या वडीलांबद्दल एवढं प्रेम आहे, मी एकच क्लिप तुम्हाला दाखवायला आणली आहे, एकच... मी खरे तर एकदाच बोललो होतो मागच्या सभांमध्ये, लावा रे तो व्हिडीओ, तेव्हा पासून सगळ्यांनी तेचं सुरु केलं. पण आता सांगतोय, लावा रे तो व्हिडीओ...," असे म्हणत राज यांनी ठाकरे गटाच्या नेत्या सुषमा अंधारे यांचा एक व्हिडीओ दाखवत, उद्धव ठाकरेंवर टीका केली.
"यांच्या (सुषमा अंधारे) अनेक क्लिप्स आहेत. पण मला त्यांच्या क्लिप्सशी काही देणं-घेणं नाही. मात्र, ज्या बाळासाहेबांबद्दल वक्तव्य करणाऱ्या या बाई... '70-75-80 वर्षाच्या म्हाताऱ्याच्या हातामध्ये तलवार दिल्यानंतर लटलटणारा हा हात', असं बोलणाऱ्या व्यक्तीला तुम्ही तुमच्या पक्षाची प्रवक्ती करता? तुम्ही तुमच्या पक्षाचा नेता करता आणि तुमच्या वडलांवर प्रेम आहे म्हणून सांगता?" असा थेट सवाल राज ठाकरे यांनी उद्धव ठाकरे यांना केला.
...त्या छगन भुजबळांसोबत, तुम्ही मांडीला मांडी लावून बसता? - ज्या छगण भुजबळांनी बाळासाहेबांना अटक करण्याचा प्रयत्न केला होता, त्या छगन भुजबळांसोबत, तुम्ही भाजपसोबत फारकत घेतल्यानंतर एका मंत्रीमांडळात मांडीला मांडी लावून बसता, तेव्हा वाटत नाही? की माझ्या वडिलांना अटक करायला लावणारा हा मानूस याच्यासोबत मी बसणार नाही. वाटलं नाही तेव्हा? कसलं फोडाफोडीचं राजकारण सांगताय तुम्ही? असेही राज ठाकरे म्हणाले.