डोंबिवली: नागरी संरक्षण दल, नवी मुंबई, समूह ठाणे* यांच्या वतीने शुक्रवारी आंतरराष्ट्रीय योग दिवसाच्या निमित्ताने नागरिकाना आणि शालेय विद्यार्थ्यांना योगाचे महत्व पटवून सांगणे आणि योगाचे प्रात्यक्षिक दाखवून योगा बद्दल जागरुकता निर्माण करण्यासाठी संघटनेचे अधिकारी व स्वयंसेवक यांनी विनायक सभागृह, गणेश मंदिर संस्थान, फडके रोड, डोंबिवली पूर्व येथे नागरिकांसाठी व सोनारपाडा जिल्हा परिषद शाळा , सोनारपाडा येथे शालेय विद्यार्थ्यांसाठी योगाचे प्रात्यक्षिक व मार्गदर्शन शिबीर घेतले.
हा योग दिन साजरा करण्यासाठी नागरी संरक्षण नवी मुंबई समूह ठाणे, चे उपनियंत्रक विजय जाधव यांचे आदेशानुसार व सहाय्यक उप नियंत्रक दिपा घरत यांचे मार्गदर्शनाखाली उपमुख्य क्षेत्ररक्षक बिमल नथवाणी, कमलेश श्रीवास्तव विभागीय क्षेत्ररक्षक हनुमान चौधरी ( योगा मास्टर), डॉ राहुल घाटवळ, अशोक शेनवी, सौ विद्या गडाख, सगीर खान यांचे सह अनेक स्वयंसेवक सहभागी झाले होते. त्याचप्रमाणे जिल्हा परिषद शाळेच्या विद्यार्थी व शिक्षक यांचेसह काही पालकांनी देखील शिबिरात सहभाग घेतला. सदर उपक्रम राबविण्यात आल्याबद्दल सोनारपाडा येथील ग्रामस्थ व कल्याण पंचायत समितीच्या माजी सभापती कल्पना पाटील यांनी संघटनेचे कौतुक करून विद्यार्थ्यांना योगाचे महत्व पटवून दिले बद्दल आभार मानले.