मीरारोड - नामफलक मराठी भाषेत न लिहणाऱ्या मीरारोड मधील ४ धार्मिक स्थळांना सार्वजनिक न्यास नोंदणी कार्यालयाचे अधीक्षक यांनी नोटीस बजावल्या आहेत . नोटीस मिळाल्या नंतर नामफलक मराठी भाषेत ठळक अक्षरात लावण्यात यावेत असे धार्मिक स्थळांना सांगण्यात आले आहे . (Notice to religious places which do not write nameplates in Marathi language)
कायद्याने मराठी भाषेत ठळक अक्षरात नामफलक लिहणे बंधनकारक असताना सुद्धा अनेक आस्थापना , धार्मिक स्थळे , हॉटेल , बार , लॉज आदी मराठी भाषेचा अनादर करून अन्य भाषेत फलक लावतात . मराठी एकीकरणी समितीने सुद्धा मराठीत नामफलक असावेत या साठी धर्मादाय आयुक्तां कडे तक्रार केली होती .
त्या अनुषंगाने मीरारोडच्या शांती नगर सेक्टर ४ मधील एक व सेक्टर ६ मधील दोन धार्मिक स्थळे तर साईबाबा नगर मधील एका धार्मिक स्थळांच्या मराठीत नामफलक नसल्या बाबतची तक्रार निनाद सावंत ह्या मराठी भाषा प्रेमी नागरिकाने केली होती .
ठाणे अधीक्षक यांनी तक्रारींच्या अनुषंगाने मीरारोड मधील सदर चार हि धार्मिक स्थळांना नोटीस बजावल्या आहेत . नोटीस मिळाल्या नंतर धार्मिक स्थळांवरील नामफलक मराठी भाषेत ठळक अक्षरात लावण्यात यावेत. तसेच मराठी भाषेत नामफलक लावले असल्याचे लेखी स्वरूपात कळवावे असे निर्देशच धार्मिक स्थळांना देण्यात आले आहेत .