मीरारोड - शहरातील सार्वजनिक गणेशोत्सव मंडळांना विविध विभागांच्या परवानग्या एकाच ठिकाणी मिळाव्यात म्हणून मीरा भाईंदर महानगरपालिका सर्व ६ प्रभाग कार्यालयात एक खिडकी योजना सुरू करणार आहे. १९ ऑगस्ट रोजी महानगरपालिका मुख्यालयात आयुक्त दिलीप ढोले यांनी अतिरिक्त आयुक्त, उपायुक्त, शहर अभियंता, कार्यकारी अभियंता, सर्व प्रभागाचे प्रभाग अधिकारी, पोलीस प्रशासन यांची सार्वजनिक गणेशोत्सव बाबत बैठक आयोजित केली होती.
त्यात मंडळांना सार्वजनिक श्रीगणेश उत्सवासाठी महानगरपालिका, पोलीस, वाहतूक पोलीस व अग्निशमन दलाची परवानगी घेणे बंधनकारक असून परवानगी शिवाय मंडप आदी कामे कोणी करत असेल, तर तत्काळ कारवाईचे आदेश आयुक्तांनी दिले आहेत. मंडळांच्या परवानगीकरीता वेगवेगळ्या ठिकाणी धावपळ होऊ नये, यासाठी महानगरपालिकेच्या सर्व १ ते ६ प्रभाग समितीच्या कार्यालयात एक खिडकी योजना सुरू करण्याचे निर्देश सर्व संबंधित अधिकारी यांना आयुक्तांनी दिले.
एक खिडकी योजनेत संबंधित प्रभागातील सर्व गणेश मंडळांना मंडपापासून सर्व आवश्यक परवानग्या महानगरपालिका, पोलीस प्रशासन, वाहतूक पोलीस तसेच अग्निशमन दला मार्फत देण्यात येणार आहेत. त्यामुळे सार्वजनिक गणेशोत्सव मंडळांनी परवानगीकरीता संबंधित प्रभाग कार्यालयात अर्ज करायचा आहे.
कोविड-१९ मुळे उद्भवलेल्या संसर्गजन्य परिस्थितीचा विचार सर्वांनीच करायचा असून कोरोना नियमांचे पालन करून घरगुती व सार्वजनिक गणेशोत्सव साजरा करण्याचे आवाहन आयुक्तांनी केले आहे.