ठाणे : उत्तर प्रदेशातील (यूपी) मेफेड्रॉन (एमडी) या अमली पदार्थाच्या पावडर निर्मितीचा आणखी एक कारखाना ठाणे गुन्हे अन्वेषण विभागाच्या युनिट एकच्या पथकाने उद्ध्वस्त केल्याची माहिती पोलिस उपायुक्त शिवराज पाटील यांनी मंगळवारी दिली. या कारवाइत ६ जणांना अटक केली असून, त्यांच्याकडून एमडी पावडरसह २० कोटी १८ लाख ४९ हजार ७१८ रुपयांचा मुद्देमाल जप्त केला असून, या आरोपींना ६ मेपर्यंत पोलिस कोठडी सुनावण्यात आली आहे.
गुन्हे अन्वेषणचे वरिष्ठ पोलिस निरीक्षक दिलीप पाटील यांच्या मार्गदर्शनाखाली सहायक पोलिस निरीक्षक रूपाली पोळ यांच्यासह चार पथकांनी पुन्हा यूपीतील वाराणसीमध्ये वेशांतर करून दोन आठवडे तळ ठोकला. यूपीच्या विशेष कृती दलाच्या मदतीने विजय पाल, बिंदू यांचा शोध घेतला. त्यांनी आजमगढमध्ये अमलीपदार्थाचा कारखाना सुरू केल्याचे समजले. त्यानुसार छापा टाकून संदीप तिवारी, ललित ऊर्फ सोनू राकेश चंद्र पाठक, अनिल जयस्वाल, नीलेश पांडे, विजय रामप्रसाद पाल, बिंदू ऊर्फ जिलाजीत जोखई पटेल, यांना अटक केली. या कारवाईत २५ ग्रॅम एमडी क्रिस्टल पावडर, २० किलो एमडी हा अमली पदार्थ तयार होत असलेले मिश्रण, आरोपींची कार आणि इतर सामग्री, असा २० कोटी १८ लाखांचा मुद्देमाल जप्त केला.
डॉक्टर द्यायचा ड्रग्जचा फॉर्म्युला
संदीप तिवारी ऊर्फ डॉक्टर हा आरोपींना आणि मुंबईतील ड्रग्ज रॅकेटमध्येही एमडी पावडर बनविण्यासाठी केमिकल मिश्रणाचा फॉर्म्युला तयार करून देत असल्याचे तपासात निष्पन्न झाले.
● यापूर्वी याच प्रकरणात ठाण्यातील कासारवडवली पोलिस ठाण्यात २४ जानेवारी २०२४ रोजी एनडीपीएसअंतर्गत गुन्हा दाखल झाला होता. यामध्ये आफताब मलाडा याच्यासह सात जणांना अटक केली होती. सुरुवातीला केवळ १५ ग्रॅम एमडी पावडरसह दोघांना ठाणे पोलिसांनी अटक केली होती.
चौकशीत उत्तर प्रदेशातून २७ कोटी ७८ लाख ५५ हजारांचा • मुद्देमालासह एमडी पावडर निर्मितीचा कारखाना उद्ध्वस्त केला होता. यामध्ये क्रिस्टल पावडर बनविण्याच्या मोठ्या प्रमाणात समावेश होता.