बदलापूर : किरकोळ भांडणातून एका इसमाला जिवंत पेटवल्याची घटना बदलापूरच्या वांगणीजवळील डोणे गावात घडली आहे. चंद्रकांत पवार असे पेटवून दिलेल्या इसमाचं नाव असून 10 सप्टेंबर रोजी त्याला पेट्रोल टाकून पेटविण्यात आले होते. त्यांचा उपचारांदरम्यान 16 सप्टेंबर रोजी मृत्यू झाला आहे.
डोने गावातील विश्वनाथ अपार्टमेंट इमारतीत ४८ वर्षीय चंद्रकांत पवार आपल्या कुटुंबासह वास्तव्याला होते. १० दिवसांपूर्वी त्यांच्या मुलीचा आरोपी निखिल गुरव याच्या आईशी वाद झाला होता. त्यानंतर १० सप्टेंबर रोजी निखिल गुरव हा पवार कुटुंबियांच्या घरी येऊन भांडण करू लागला. याच दरम्यान त्याने चंद्रकांत पवार यांच्या अंगावर पेट्रोल टाकून त्यांना पेटवून दिलं. यात गंभीर जखमी झालेल्या पवार यांचा १६ सप्टेंबर रोजी मुंबईत उपचारांदरम्यान मृत्यू झाला. याप्रकरणी बदलापूर ग्रामीण पोलिसांनी हत्या आणि ऍट्रॉसिटीचा गुन्हा दाखल करत आरोपी निखिल गुरव याला बेड्या ठोकल्या आहेत. या प्रकारामुळे ग्रामीण भागात तणावाचं वातावरण आहे.