उल्हासनगर : व्यापारी संघटनेचे पदाधिकारी व कलानी समर्थक दीपक छतलानी यांनी भाजपाचे प्रदेशाध्यक्ष चंद्रकांत पाटील यांच्या उपस्थित मुंबई येथे प्रवेश केला. यावेळी आमदार कुमार आयलानी यांच्यासह पक्षाचे शहर पदाधिकारी उपस्थित होते.
उल्हासनगरात गेल्या पाच वर्षांपूर्वी ओमी कलानी यांनी युटीए व्यापारी संघटनेची स्थापना केल्यावर, संघटनेच्या अध्यक्षपदी सुमित चक्रवर्ती तर कार्याध्यक्षापदी दिपक छतलानी यांची निवड केली होती. दीपक छतलानी यांनी व्यापारी संघटनेच्या विविध समस्या सोडल्या असून पे अँड पार्कचा मंजूर झालेला प्रस्ताव रद्द करण्यास महापालिका प्रशासनाला व सर्वपक्षीय नगरसेवकांना भाग पाडले.
दरम्यान छतलानी यांचे व्यापारी पदाधिकाऱ्यांत मतभेत झाल्याने, त्यांनी युटीए संघटनेच्या पदाचा राजीनामा दिला. त्यानंतर स्वतःची व्यापारी संघटना स्थापन करून व्यापाऱ्याचे प्रश्न सोडविण्यास सुरवात केली. अखेर त्यांनी भाजपात जाण्याचे संकेत एका महिन्यापूर्वी दिले होते. बुधवारी मुंबई येथे भाजपचे प्रदेशाध्यक्ष चंद्रकांत पाटील यांच्या उपस्थितीत छतवानी यांनी प्रवेश घेतला. छतवानी यांच्या प्रवेशाने राष्ट्रवादीला धक्का बसला असून भाजपची व्यापारी संघटना मजबूत होणार असल्याची प्रतिक्रिया आमदार कुमार आयलानी यांनी दिली.