मिरारोड - उत्तन सागरी पोलीस ठाण्यातील दोघा पोलीस कर्मचाऱ्यांना मद्यधुंद टोळक्याने मारहाण केल्या प्रकरणी पाली गावातील ५ आरोपीना पोलिसांनी अटक केली असून त्यांना २३ जून पर्यंत पोलीस कोठडी मिळाली आहे .
सोमवारच्या मध्यरात्री दरम्यान सहाय्य्क फौजदार बाळासाहेब कोळी व हवालदार संजय शिवलकर हे दोघे बीटमार्शल दुचाकीवरून तरोडी , चौक अशी गस्त घालून पाली गावात आले . त्यावेळी तेथील पेट्रोल पंप जवळ ५ जणं मद्यधुंद अवस्थेत आरडा ओरडा करत होते . शिवलकर यांनी , इतक्या रात्री काय आरडा ओरडा करता , घरी जावा असे सांगताच एकाने येऊन त्यांच्या कानशिलात लगावली . मागे बसलेल्या कोळींनी त्याला रोखताच अन्य चौघा साथीदारांनी येऊन दोघा पोलिसांना शिविगाळ करत मारहाण सुरु केली . त्यांना फरफटत नेले . कोळी यांचे शर्ट फाडून डोळ्यावर बुक्का मारल्याने जखम झाली आहे .
या घटनेनंतर आरोपी पळून गेले होते . अखेर पोलिसांनी सर्व पाच हि आरोपीना अटक करून गुरुवारी न्यायालयात हजर केले . गॉडफ्री फर्नांडिस ( २७) , लॉइड सोज (३०), रॅम्बो बावेघर (२२) , बॅण्डम गोन्साल ( २४) व सनी भंडारी (२०) अशी पोलिसांना मारहाण केल्या प्रकरणी अटक आरोपींची नावे आहेत . हे सर्व पाली गावचे राहणारे असून भंडारी याचे घटने आधी एका पार्टीत पण भांडण झाल्याचे पोलीस सूत्रांनी सांगितले .