मीरारोड - ईडीची काडी कोणी व कशासाठी केली, हे जनतेला कळून चुकलेले आहे. स्वतः मुख्यमंत्री उद्धव ठाकरे यांनी विधिमंडळात परखड भूमिका मांडली आहे. मी असल्या चौकशांनी घाबरून महाराष्ट्र हिताची जबाबदारी बाजूला ठेवणार नाही. मी लढणारा आहे आणि लढत राहणार. मी स्वतः ईडीच्या अधिकाऱ्यांना सांगितले आहे, नुसता फोन केलात तरी शंभर वेळा हजर होईन. पण मुलांचा काही संबंध नसताना त्यांना कशाला बोलावता असे, आमदार प्रताप सरनाईक यांनी म्हटले आहे. ईडीची धाड आणि चौकशीनंतर पहिल्यांदाच सरनाईक हे मीरा भाईंदर महापालिकेत आले होते. त्यांनी पत्रकार परिषद घेतली.
अभिनेत्री कंगना रणौतने पाकिस्तानचे क्रेडिट कार्ड मिळाल्याचे केलेल्या ट्विट बद्दल बोलताना ते म्हणाले की, कंगनाने कुठून स्वप्न दिसले माहित नाही . अश्या देशाचे तरी नाव घ्यायचे होते कि ज्या देशाचे जगात क्रेडिट असेल. ज्या देशाचे क्रेडिटच नाही त्याचे क्रेडिट कार्ड ठेऊन काय करणार असा टोला त्यांनी लगावला . कंगना आणि तिच्या ट्विटच्या आधारे खोट्या बदनामीकारक बातम्या देणाऱ्यांवर हक्कभंगा सह कायदेशीर कार्यवाही सुद्धा करणार असल्याचा इशारा त्यांनी दिला .
टॉप्स प्रकरणी दाखल दोन्ही गुन्ह्यात आपले कुठेही नाव नसताना व कोणता पुरावा नसताना केवळ तोंडी कोणीतरी बोलले ह्या आधारावर चौकशी केली जात असल्या बद्दल त्यांनी आश्चर्य व्यक्त केले . ईडीला त्यांच्या चौकशीत पूर्ण सहकार्य करत आहोत आणि भविष्यात पण करणार . कंगना आणि अर्णब वर हक्कभंग टाकल्या नंतर माझ्या मागे ईडीची चौकशी लावली गेली आहे. पण आपण घाबरणार नाही.
शुरवीर तानाजी मालुसरे यांच्याबद्दलदेखील जाणीवपूर्वक अपूर्ण प्रतिक्रिया दाखवत दिशाभूल करून वाद निर्माण करण्याचे कारस्थान आहे. तानाजी मालुसरे स्वराज्यासाठी आणि महाराजांसाठी जीवाची बाजी लावून लढणारे शूर योध्दा होते. त्यामुळे तानाजी मालुसरे माझ्यासाठी प्रेरणास्तोत्र आहेत. त्यांच्या मार्गावरच चालण्याचा प्रयत्न असतो असे ते म्हणाले.
आपण ईडी अधिकाऱ्यांना सांगितले की, मुलांना कसले बोलावता. त्यांचा काय संबंध. मुलं अजून लहान असून आत्ता कुठे त्यांचे करियर सुरु झाले आहे. उलट मला नोटीस पण नका पाठवू , नुसता फोन केला तरी मी ईडी कार्यालयात चौकशीसाठी हजर होईन असे अधिकाऱ्यांना सांगितल्याचे सरनाईक म्हणाले.