ठाणे - शहरातील कासारवडवली भागात एका २६ वर्षीय तरुणीवर चौघा मित्रांनी सामूहिक लैंगिक अत्याचार केल्याची घटना उघडकीस आली आहे. याप्रकरणी विनयभंग, लैंगिक अत्याचार आणि अनैसर्गिक अत्याचार केल्याचा गुन्हा कासारवडवली पोलीस ठाण्यात मंगळवारी दाखल झाला आहे. यातील आरोपींच्या शोधासाठी दोन पथकांची निर्मिती केल्याची माहिती पोलीस उपायुक्त डॉ. विनय राठोड यांनी दिली.
ठाण्यातील एका बारमध्ये ही पीडित तरुणी वेटरचे काम करते. तिथेच तिची ओळख गोविंद राजभर (३२, रा. नालासोपारा, पालघर) याच्याशी झाली. याच ओळखीतून त्यांच्यात मैत्री झाल्यानंतर त्याने लग्नाचे अमिष दाखवून घर खरेदीसाठी तिच्याकडून सात लाख ५५ हजारांची रोकड आणि सोन्याचे दागिने घेतले. नंतर तिच्याबरोबर शारिरिक संबंध ठेवून तिचे अश्लील व्हिडिओ काढले. पुढे ते व्हायरल करण्याची भीती दाखवून घोडबंदर रोड येथील वेगवेगळया हॉटेलमध्ये तिच्यावर लैंगिक अत्याचार तसेच अनैसर्गिक अत्याचार करुन तिला मारहाण आणि शिवीगाळही केली. इतक्यावरही न थांबता त्याने तिला धमकावून त्याच्याच तीन मित्रांच्या स्वाधीन केले. या तिघांनी काशीमीरा भागातील वसईकडे जाणाऱ्या ब्रिजच्या आधी फाऊंटन हॉटेलजवळ एका कारमध्ये पुन्हा तिच्यावर सामुहिक लैंगिक अत्याचार केला. हा प्रकार १ फेब्रुवारी २०१९ ते ३० ऑगस्ट २०२१ या कालावधीमध्ये घडल्याचे या पिडित तरुणीने आपल्या तक्रारीमध्ये म्हटले आहे. वरिष्ठ पोलीस निरीक्षक किशोर खैरनार यांच्या मार्गदर्शनाखाली सहायक पोलीस निरीक्षक शीतल चौगुले याप्रकरणी अधिक तपास करीत आहेत.