मीरारोड - मीरारोडच्या प्लेझंट पार्क भागात एका चारचाकी मोटार मधूनच क्रिटीकेटवर चालणारा सट्टा पोलिसांच्या कारवाईत उघडकीस आला आहे .
काशीमीरा पोलीस गस्त घालत असताना त्यांना प्लेझंट पार्क भागात रस्त्याच्या कडेला गाडी लावून त्यातून क्रिकेटवर सट्टा चालवत असल्याची माहिती पोलिसांना मिळाली . पोलिसांनी गाडीत बसलेल्या केविन शाहची चौकशी सुरु करत त्याचे मोबाईल तपासले .
त्यात एका संकेतस्थळावरून पाकिस्तान सुपर लीग सुरू असलेल्या सामन्यावर सट्टा खेळवला जात होता . सट्टा खेळणाऱ्यांना आयडी व पासवर्ड देत असल्याचे सांगितले. त्याच्या मोबाईलची तपासणी केली असता क्रिकेट, फुटबॉल व तीन पत्ती च्या खेळावर ऑनलाईन जुगार खेळत असल्याचे दिसून आले. अंधेरी येथील मनीष चोटी उर्फ मनीष संकेत याने पासवर्ड व आयडी देण्याची वितरण एजन्सी मिळवून दिल्याचे सांगितले.
ऑनलाईन क्रिकेट बेटिंग व ऑनलाईन जुगारात केविन आणि मनीष यांचा सहभाग असल्याचे उघड झाल्याने त्यांच्यावर काशीमीरा पोलीस ठाण्यात गुन्हा दाखल करण्यात आला आहे . मोटारकार व मोबाईल पोलिसांनी ५ लाख १० हजारांचा मुद्देमाल जप्त केला आहे.
वरिष्ठ पोलीस निरीक्षक संदीप कदम यांच्या मार्गदर्शनाखाली उपनिरीक्षक प्रकाश कावरे सह निलेश शिंदे , सचिन हुले , सुधीर खोत व राहुल सोनकांबळे यांच्या पथकाने हि कारवाई केली .