लोकमत न्यूज नेटवर्कठाणे : कोरोनाची पहिली लाट आल्यानंतर म्हाडाने कौसा येथे अत्याधुनिक कोविड रुग्णालयाची उभारणी केली होती. या रुग्णालयात सर्व अत्याधुनिक साहित्य लावले होते. ठामपाचे आरोग्य अधिकारी डॉ. राजू मुरूडकर यांनी हे तब्बल १२ ते १४ कोटींचे साहित्य लंपास केल्याची बाब समोर आली आहे. जर, हे साहित्य जसे होते त्या स्थितीत ४८ तासात पुन्हा ठेवण्यात आले नाही तर आम्ही चोरीचा गुन्हा दाखल करू, असा इशारा गृहनिर्माण मंत्री जितेंद्र आव्हाड यांनी दिला आहे.महाराष्ट्रात कोरोनाची पहिली लाट आल्यानंतर आव्हाड यांच्या आदेशानुसार कळवा आणि मुंब्रा भागात सक्षम आरोग्य यंत्रणा उभी केली होती. कौसा येथे म्हाडाच्या वतीने अद्ययावत अशा कोविड रुग्णालयाची उभारणी केली होती. मात्र, सप्टेंबरनंतर कोरोनाचा कहर कमी झाला होता. हाच फायदा घेऊन डॉ. मुरूडकर यांनी सर्व साधने लंपास केली आहेत. कोरोनाची दुसरी लाट आल्यानंतर आव्हाड यांनी कौसा येथील रुग्णालयाची पाहणी केली असता, हा प्रकार उघडकीस आला.या प्रकारामुळे आव्हाड हे संतप्त झाले आहेत. गोरगरीबांसाठी उभी केलेली ही यंत्रणा उद्ध्वस्त करणाऱ्या डॉ. मुरूडकर यांना निलंबित करण्याची सूचनाही त्यांनी केली आहे.कोरोनाचा कहर वाढल्याने आपण म्हाडाने उभ्या केलेल्या रूग्णालयाची पाहणी करण्यासाठी गेलो असता, त्या ठिकाणी सर्व साधने अस्ताव्यस्त असल्याचे दिसून आले. सुरक्षा रक्षकांकडे विचारणा केल्यावर खरा प्रकार उघडकीस आला. ठामपाचे आरोग्य अधिकारी डॉ. मुरुडकर यांनी रुग्णालयातील सुमारे ९४ व्हेंटीलेटर्स आणि अन्य साहित्य लंपास केले आहेत. म्हाडाच्या मालकीची ही आरोग्य साधने काढून नेताना पाईपलाईन देखील तोडून टाकण्याचे काम डॉ. मुरुडकर यांनी केले आहे. ही साधने ठामपाच्या मालकीची नसतानाही ती नेऊन भाड्याने दिली आहेत. म्हाडाच्या मालकीची सुमारे बारा ते चौदा कोटींची आरोग्य साधने अशा पद्धतीने लंपास का केली? असा सवाल करीत अशा बेजबाबदार अधिकाºयाला तत्काळ निलंबित करावे, तसेच येत्या ४८ तासांमध्ये सर्व साधने पूर्वस्थितीत आणून सुरु न केल्यास चोरीचा गुन्हा दाखल करू, असेही आव्हाड यांनी म्हटले आहे.
‘‘ मुंब्रा येथील कौसा कोविड सेंटर डिसेंबर २०२० मध्ये बंद झाले होते. त्यामुळे तेथील साधनसामुग्री ही तशीच पडून होती. त्यामुळे पालिका आयुक्तांच्या परवानगीने या सामुग्रीमधील ३० व्हेंटीलेटर ग्लोबल हॉस्पीटल आणि ६४ पार्र्किं ग प्लाझा हॉस्पीटल मध्ये ठेवले होते. ते लंपास केले नाही. यातील पार्र्किंग प्लाझाचे व्हेंटीलेटर्स परत केले. ग्लोबलचेही परत केले जाणार आहे. गृहनिर्माण मंत्र्यांची परवानगी घेतली नाही. हीच चुक झाली.’डॉ. राजू मुरुडकर, आरोग्य अधिकारी, ठाणे महापालिका.