ठाणे : ऑक्सिजनच्या मर्यादित पुरवठ्यामुळे कोरोना रुग्णांची होणारी गैरसोय टाळण्यासाठी ठाणे महापालिका आणि एमएमआरडीए यांच्या संयुक्त विद्यमाने, ठाणे पार्किंग प्लाझा डेडिकेटेड कोविड हेल्थ सेंटर येथे उभारण्यात आलेल्या एफडीए प्रमाणित पहिल्या ऑक्सिजन प्रकल्पाचा प्रारंभ नगरविकासमंत्री तथा ठाणे जिल्ह्याचे पालकमंत्री एकनाथ शिंदे यांच्या हस्ते आणि महापौर नरेश गणपत म्हस्के यांच्या अध्यक्षतेखाली संपन्न झाला. २० टन ऑक्सिजन क्षमतेच्या या दोन प्रकल्पांमुळे ठाणे कोविड रुग्णालय आणि पार्किंग प्लाझा रुग्णालयांवरील ताण कमी होण्यास मदत होणार आहे. सुरुवातील ३.२ टन इतका ऑक्सिजन मिळणार आहे.
पहिल्या टप्प्यात दोन प्लान्ट सुरू झालेले असून, आणखी एक प्लान्ट कळवा रुग्णालयात सुरू करण्यात येणार असून, त्या ठिकाणी ६५० जम्बो सिलिंडर ऑक्सिजन रोज निर्माण होणार असल्याची माहिती शिंदे यांनी दिली, तसेच आणखी एक २२५ ऑक्सिजन सिलिंडर प्लान्ट येत्या काही दिवसांत कार्यान्वित करण्यात येणार असल्याचेही त्यांनी स्पष्ट केले. एमएमआर क्षेत्रात अशाच प्रकारे ऑक्सिजन निर्मिती प्लान्ट उभारण्याचे काम युद्धपातळीवर सुरू असल्याचे त्यांनी स्पष्ट केले.
या कार्यक्रमास खा.राजन विचारे, आ.रवींद्र फाटक, उपमहापौर पल्लवी कदम, स्थायी समिती सभापती संजय भोईर, सभागृहनेते अशोक वैती, विरोधी पक्षनेते अशरफ शानू पठाण, महापालिका आयुक्त डॉ.विपिन शर्मा, माजिवडा मानपाडा प्रभाग समिती अध्यक्ष भूषण भोईर, सांस्कृतिक कार्यक्रम समिती अध्यक्षा प्रियांका, स्थानिक नगरसेविका विमल भोईर, अतिरिक्त आयुक्त गणेश देशमुख, संजय हेरवाडे, उपायुक्त संदीप माळवी, माहिती व जनसंपर्क अधिकारी महेश राजदेरकर, वैद्यकीय अधिकारी डॉ.चारुदत्त शिंदे आदी उपस्थित होते.
अवघ्या १५ दिवसांत युद्धपातळीवर हा प्रकल्प कार्यान्वित करण्यात आला. महापालिकेने स्वत:चा ऑक्सिजन प्रकल्प पीएसए तंत्रज्ञानावर उभा केला आहे. एफडीए प्रमाणित या पहिल्या प्रकल्पाची उभारणी करण्यात आली असून, हवेतील ऑक्सिजन टाकीमध्ये साठवून त्यामधील अशुद्ध घटक वेगळे करण्यात येतात. या ऑक्सिजनची शुद्धता ९३ टक्के आहे.
या दोन्ही प्रकल्पांतून प्रती दिवस ३५० सिलिंडर इतका ऑक्सिजन निर्माण होणार आहे. साधारणत १५० रुग्णांना १० लीटर प्रती मिनीट ऑक्सिजन पुरवठा करणे शक्य होणार आहे. या प्रकल्पाद्वारे निर्माण केलेला ऑक्सिजन पाइपलाइनद्वारे रुग्णालयास पुरविण्यात येणार आहे. या प्लान्टमध्ये वापरण्यात आलेले कॉम्प्रेसर हे जर्मन बनावटीचे आहेत, तर ऑक्सिजन जनरेटर अमेरिकन बनावटीचे आहेत.
.........
राज्यातील हा पहिला ऑक्सिजन प्रकल्प असून, येथून रोज ३५० जम्बो ऑक्सिजन सिलिंडर निर्माण करणार आहे. ३०० बेड ऑक्सिजन पेशन्टसाठी हा पुरवठा करणार आहे. २२५ जम्बो सिलिंडरचा प्लान्ट लवकरच सुरू होणार आहे, तसेच कळवा रुग्णालयातही ६५० जम्बो सिलिंडरचा प्रकल्प रुग्णालयात सुरू होणार आहे. एकूण चार प्लान्ट महापालिका हद्दीत सुरू होणार असून, त्याचा फायदा रुग्णांसाठी होणार आहे. राज्याच्या इतर ठिकाणी अशाच पद्धतीने ऑक्सिजनचे प्लान्ट तयार करण्याचे काम सुरू आहे. ज्यांनी यासाठी मेहनत घेतली, त्या सर्वांचे मी अभिनंदन करीत आहे.
- एकनाथ शिंदे, पालकमंत्री, ठाणे जिल्हा
...............
वाचली