कॉंग्रेसचे ठाण्यात खड्डे भरो आंदोलन

ठाणे : शहरातील विविध रस्त्यांवर खड्डेच खड्डे असे चित्र आहे. पाच दिवसांचे गणपती विसर्जन होत असतानादेखील पालिकेने खड्डे बुजविण्याचे आश्वासन पूर्ण केले नाही. त्यामुळे ठाणे शहर कॉंग्रेसने नौपाडा, कळवा, वर्तकनगर, वागळे इस्टेट, घोडबंदर, मुंब्रा, कोपरी, पारसिकनगर आदी परिसरात खड्डे भरो आंदोलन करून प्रशासनाला जाग आणण्याचा प्रयत्न केला.

ठाणे शहर कॉंग्रेसचे अध्यक्ष विक्रांत चव्हाण यांच्या नेतृत्वाखाली शहराच्या विविध भागात हे आंदोलन करण्यात आले. ठाणे शहरात जिल्हा काँग्रेस सरचिटणीस सचिन शिंदे, ब्लॉक अध्यक्ष संदीप शिंदे यांच्या नेतृत्वाखाली आंबेडकर रोड येथील खड्डे बुजवून निषेध नोंदवण्यात आला. वर्तकनगर येथे काँग्रेस जिल्हाध्यक्ष ॲड. विक्रांत चव्हाण व ब्लॉक अध्यक्ष आनंद सांगळे यांच्या नेतृत्वाखाली आंदोलन करण्यात आले. नौपाडा येथे काँग्रेस नेते रवींद्र आंग्रे, शेखर पाटील यांच्या नेतृत्वाखाली, तर वागळे इस्टेट येथे काँग्रेस नेते अंजनी सिंग, मुंब्रा येथेही अनिल भगत यांच्या मार्गदर्शनाखाली आंदोलन करण्यात आले.