भिवंडीत अग्नितांडव सुरुच असून शहरात पुन्हा भीषण आग लागल्याची घटना समोर आली आहे शहरातील फातिमा नगर परिसरात असलेल्या पत्र्यांच्या खोल्यांना शुक्रवारी भीषण आग लागली होती. या आगीत सुमारे १० पत्र्याच्या खोल्या जळून खाक झाल्याने १० कुटूंबाच्या संसाराची राखरांगोळी झाली आहे. सुदैवाने खोल्यात राहणारे ५० ते ६० रहिवाशांना सुरक्षतरित्या बाहेर काढण्यात नागरिक तसेच अग्निशमन दलाच्या जवानांना यश आले असल्याने मोठी जिवीत हानी टळली आहे. मात्र आगीचे नेमकी कारण अद्यापही समजू शकले नाही.
शहरातील फातिमानगर परिसर दाट रहिवासी परिसर आहे.कामगार व मजूर या भागात मोठ्या संख्येने असल्याने याठिकाणी लोखंडी पत्र्यांच्या खोल्या मोठ्या प्रमाणात थाटण्यात आल्या आहेत. शुक्रवारी रात्रीचे जेवण करून करून सर्वजण घरात झोपलेले होते. अचानक मध्यरात्रीच्या सुमारास एका बंद पत्र्याच्या खोलीत भीषण आग लागली. या आगीच्या धुराचा लोट शेजारच्या खोलीत शिरल्याने रहिवाशी खडबडून जागे झाले. आग लागल्याचे समजल्यानंतर परिसरात आरडाओरडा सुरू झाला. परिसरातील नागरिकांनी तात्काळ अग्निशमन दलाला माहिती दिली. माहिती मिळताच भिवंडी अग्निशमन दलाच्या दोन गाड्या घटनास्थळी दाखल झाल्या. मात्र तोपर्यंत आगीने रौद्र रूप धारण केलं होतं. रांगेत असलेल्या पत्र्यांच्या खोल्यांचे भीषण आग लागली होती. घरातील नागरिकांना कसेबसे सुरक्षित बाहेर काढण्यात आलं. जवळपास पन्नास ते साठ नागरिकांना सुरक्षितरित्या बाहेर काढण्यात नागरिकांना तसेच अग्निशमन दलाच्या जवानांना यश आलं. मात्र यामध्ये घरातील सर्व संसार उपयोगी साहित्य जळून खाक झाल्याने नागरिकांचं मोठं नुकसान झालं आहे. अग्निशमन दलाच्या जवानांनी तीन तासाच्या अथक प्रयत्नानंतर या आगीवर पूर्णतः नियंत्रण मिळवले आहे.