नितीन पंडित, लोकमत न्यूज नेटवर्क, भिवंडी: अजित पवार गटाचे शहापूरचे आमदार दौलत दरोडा यांच्या खाजगी पीएचा अपघातात मृत्यू झाल्याची घटना भिवंडीतील मुंबई नाशिक महामार्गावरील रांजणोली गावाच्या हद्दीत एका बार समोर रविवारी रात्री घडली आहे.याप्रकरणी कोनगाव पोलीस ठाण्यात अज्ञात वाहन चालकावर विविध कलमानुसार गुन्हा दाखल करण्यात आला आहे. प्रशांत सुरेश भोईर (वय, ३० रा. वाशिंद ) असे अपघातात मृत्यू झालेल्या स्वीय सहाय्यकाचे नाव आहे.
मयत प्रशांत हा वाशिद मध्ये कुटूंबासह राहून अजित पवार गटाचे शहापूरचे आमदार दौलत दरोडा यांचे खाजगी पीए म्हणून कार्यरत होते.रविवारी मध्यरात्री तक्रारदार रवींद्र गणपत मडके (वय ३८ रा.चेरपोली शहापूर) हे मित्रांसह कारमधून मुंबई नाशिक महामार्गावरील रांजणोली गावाच्या हद्दीत एका बारमध्ये आले. त्यावेळी प्रशांत हा दोन मित्रांसह दुसऱ्या कारमधून त्याच बारमध्ये आला. मध्यरात्री १ वाजून २० मिनिटांनी बार बंद झाल्याने तक्रारदार रवींद्र मडके व त्यांच्या सोबते मित्र घरी जाण्यास निघाले. मात्र प्रशांत ज्या कारमधून आला होता, त्या कारचालक मित्राने तक्रारदार रवींद्र यांना मोबाईलवर संपर्क करून सांगितले की, प्रशांत आमच्या कारमध्ये नाही. तुम्ही येताना त्याला कार मधून घेऊन या, असा निरोप दिला.
मडके यांनी कार पुन्हा बारकडे वळवून आणली असता, मुंबई नाशिक महामार्गावरील स्वागत बार समोर प्रशांत गंभीर जखमी अवस्थेत पडून होता. ही घटना पाहताच दोन्ही कारमधील मित्रांनी जखमी प्रशांतला नजीकच्या खाजगी रुग्णालयात दाखल केले मात्र, प्रकृती गंभीर असल्याने त्याला कार्डिओ रुग्णवाहिकेतून दुसऱ्या रुग्णालयात नेण्यात आले. तेथील रुग्णालयातील डॉक्टरने तपासून प्रशांतला मृत घोषित केले.
प्रशांतचा मृतदेह शवविच्छेदनासाठी भिवंडीतील स्वर्गीय इंदिरा गांधी उपजिल्हा रुग्णालयात आणला होता. या घटनेची नोंद कोनगाव पोलीस ठाण्यात अज्ञात वाहन चालकावर गुन्हा दाखल करण्यात आला आहे.