कुमार बडदे, लोकमत न्यूज नेटवर्क, मुंब्रा (ठाणे): तात्पुरत्या स्वरुपात उभारण्यात आलेल्या दुकानांमध्ये लागलेल्या आगीत चार दुकाने जळून खाक झाल्याची तसेच त्यामध्ये असलेल्या एका सिलेंडरचा स्फोट झाल्याची घटना शनिवारी मध्यरात्री मुंब्रा जवळील शिळफाटा परिसरात घडली.
शिळफाटा परीसरात असलेल्या एका खाजगी बँकेच्या जवळ तात्पुरत्या स्वरूपात उभारण्यात आलेल्या पत्र्याच्या शेड मधील तीन फर्निचर दुकाने व एक भंगार साहित्य असलेल्या दुकानांना शनिवारी मध्यरात्री २ वाजून २० मिनिटांच्या सुमारास भीषण आग लागली. याबाबतची माहिती मिळताच वीज वितरण करणाऱ्या खाजगी कंपनीचे कर्मचारी आणि अग्निशमन दलाचे जवानांनी घटनास्थळी धाव घेतली. जवानांनी १ फायर तसेच १ रेस्क्यू वाहन आणि २ वॉटर टँकरच्या मदतीने अथक प्रयत्नांनी एक तासात मध्यरात्री सव्वातीन वाजण्याच्या सुमारास आग पूर्णपणे विझवली.
या घटनेत कुणालाही दुखापत झाली नाही. परंतु फर्निचर दुकानांमधील लाकडी सोफा, कपाट, बेड इतर इतर फर्निचर साहित्य जळून खाक झाले असल्याची माहिती ठामपाच्या आपातकालिन कक्षातील अधिकाऱ्यांनी दिली.