केडीएमसी हद्दीत अवघ्या २२ दिवसांत ६,६७६ रुग्ण

कल्याण : कल्याण डोंबिवलीत कोरोनाचा कहर सुरूच असून, सोमवारी तब्बल ६८६ नवे रुग्ण आढळले आहेत. आतापर्यंतची ही सर्वोच्च रुग्णसंख्या असून, याआधी १२ जुलैला सर्वाधिक ६६१ रुग्ण आढळले होते. सोमवारी दोन रुग्णांचा उपचारादरम्यान मृत्यू झाला आहे, तर २४ तासांत ४२३ रुग्णांना उपचाराअंति बरे झाल्याने डिस्चार्ज मिळाला आहे. नव्या रुग्णांची भर पडल्याने सद्य:स्थितीला पाच हजार १५५ रुग्णांवर उपचार सुरू आहेत. मार्च महिन्याच्या पहिल्या २२ दिवसांत सहा हजार ६७६ रुग्ण सापडल्याने प्रशासनाची चिंता वाढली आहे.

केडीएमसीच्या हद्दीत कोरोनाचा पहिला रुग्ण १४ मार्चला सापडला होता. ८ जूनपर्यंत लागू झालेल्या लॉकडाऊनच्या कालावधीत रुग्णांची संख्या एक हजार ५६२ इतकी होती, तर यातील ४६ रुग्णांचा उपचारादरम्यान मृत्यू झाला होता. परंतु, आजमितीला कोरोनाबाधितांचा आकडा ७१ हजार १५५ पर्यंत पोहोचला आहे. यातील ६४ हजार ८७७ रुग्ण उपचाराअंति बरे होऊन घरी परतले आहेत. तर एक हजार २२८ रुग्णांचा मृत्यू झाला आहे. कल्याण पश्चिम आणि डोंबिवली पूर्व भागात रुग्णसंख्या मोठ्याप्रमाणात वाढत असून, सोमवारी अनुक्रमे तब्बल २२६ आणि २३५ रुग्ण आढळले आहेत. डोंबिवली पश्चिमेतही ९७, तर कल्याण पूर्वेत ८७ नवे रुग्ण सापडले आहेत, तर २१ जणांचा मृत्यू झाला आहे. विशेष बाब म्हणजे आढळलेल्या नव्या रुग्णांमध्ये ८० ते ८५ टक्के रुग्ण हे लक्षणेविरहित आहेत.

-------------------------------------------

जून महिन्याचा रेकॉर्ड तोडला

८ जून २०२०पासून लॉकडाऊन संपुष्टात येऊन अनलॉक सुरू झाले. १ जून ते ३० जून कालावधीत नवे पाच हजार ५४२ रुग्ण आढळून आले होते. जून महिन्यातील रुग्णसंख्येला पाठीमागे टाकून मार्च महिन्यातील २२ दिवसांत रुग्णांचा आकडा सहा हजार ६७६ वर पोहोचला आहे. कोरोनाच्या दुसऱ्या लाटेत कोरोनाचा कहर सुरूच असून, कोरोनाच्या वाढलेल्या संक्रमणाला नागरिकांचा निष्काळजीपणा कारणीभूत ठरत असल्याचे बोलले जात आहे.

---------------------------------------------

पाटीदार भवन केंद्र सुरू होणार

प्रतिदिन ६०० ते ६५०हून अधिक रुग्ण नव्याने आढळत आहेत. सद्य:स्थितीला डोंबिवलीतील सावळाराम महाराज म्हात्रे क्रीडा संकुल, जिमखाना आणि कल्याणमधील लालचौकी येथील आर्ट गॅलरी याठिकाणच्या कोविड केंद्रांवर रुग्णांवर उपचार सुरू आहेत. पुरेशी बेड संख्या असली तरी दिवसागणिक वाढत चाललेली रुग्णसंख्या पाहता येत्या दोन दिवसांत डोंबिवली दावडी येथील पाटीदार भवन कोविड केंद्र सुरू केले जाणार असल्याची माहिती केडीएमसीच्या साथरोग नियंत्रण विभागाच्या अधिकारी डॉ. प्रतिभा पानपाटील यांनी दिली.

------------------------------------------------------